Трамп ва Путин телефон орқали мулоқот қилди

Кеча, 18 март куни АҚШ президенти Доналд Трамп ва Россия президенти Владимир Путин телефон орқали мулоқот ўтказди. Улар Украинадаги урушни тўхтатиш ва тинчликка эришиш муҳимлигини муҳокама қилишди. Иккала давлат раҳбари бу можаро тезроқ ҳал қилиниши кераклиги борасида ҳамфикр эканини таъкидладилар.

 

Суҳбат давомида Трамп ва Путин АҚШ ҳамда Россия ўртасидаги муносабатларни яхшилаш зарурлигини таъкидлашди. Урушда қурбон бўлаётган инсонлар, сарфланаётган ресурслар икки давлат халқларининг фаровонлигига йўналтирилса мақсадга мувофиқ бўлиши қайд этилди.

 

Лидерар тинчлик сари илк қадам сифатида энергетика ва инфратузилма соҳасида ўт очишни тўхтатишга келишиб олишди. Шунингдек, Қора денгиз йўлларининг хавфсизлигини таъминлаш, урушни тўлиқ тўхтатиш ва узоқ муддатли тинчлик ўрнатиш бўйича техник музокаралар ўтказилиши ҳақида келишиб олинди. Бу жараён тез орада Яқин Шарқдан бошланади.

 

Суҳбат чоғида президентлар Яқин Шарқдаги можароларнинг олдини олиш бўйича ҳамкорлик қилиш имкониятларини ҳам муҳокама қилишди. Улар стратегик қуролларнинг тарқалишига йўл қўймаслик бўйича биргаликда ишлашга келишиб, бу йўналишда бошқа давлатлар ёрдамида ҳаракат қилишни режалаштиришди. Шунингдек, Эрон ҳеч қачон Исроилни йўқ қилиш имкониятига эга бўлмаслиги кераклиги борасида умумий позицияда қолишди.

 

Ҳар икки раҳбар ҳам АҚШ ва Россия ўртасида яхшироқ муносабатлар ўрнатиш ва улкан имкониятлар яратишни режалаштиришди. Бу жараёнлар нафақат сиёсий барқарорликни, балки йирик иқтисодий битимлар тузиш имкониятларни ҳам бериши таъкидлаб ўтилди. Икки томон тинчлик йўлида қадам ташлашга тайёр эканликларини билдиришди.