O‘zbekiston Migratsiya agentligi Yaponiyaning Proud Partners kompaniyasi bilan hamkorlikda o‘zbekistonliklarga mo‘ljallangan ish imkoniyatlarini e’lon qildi. Dastur doirasida 250 ta yetkazib beruvchi haydovchi va 150 ta qurilish sohasi ish o‘rinlari mavjud bo‘lib, nomzodlar Toshkentda 1–2 dekabr kunlari bo‘lib o‘tadigan suhbat orqali tanlanadi.
Haydovchilar uchun B yoki C toifadagi guvohnoma, 21–35 yosh va xavfsizlik qoidalariga rioya qilish talab qilinadi. Qurilish sohasi ishchilari esa 18–35 yosh oralig‘ida bo‘lishi, mehnat intizomi va xavfsizlikni ta’minlay olishi kerak.
Ish beruvchi tomonidan 2000 AQSH dollaridan boshlanuvchi maosh, yiliga ikki martalik bonus, turar joy, tibbiy sug‘urta va aviachipta xarajatlarini qoplash kabi imtiyozlar taklif etiladi. Shu bilan birga, yapon yoki ingliz tilini bilgan nomzodlar ustunlikka ega bo‘ladi.
Angren shahrida bepul yapon tili kurslari ham tashkil etilishi rejalashtirilgan. Ushbu tashabbus, O‘zbekiston fuqarolarini xorijda tartibli va yuqori maoshli ish o‘rinlariga yo‘naltirishga qaratilgan tizimli ishlarning davomidir, natijada xorijdan yuborilayotgan mablag‘ miqdori sezilarli oshmoqda.