Давлат экология қўмитаси инспекторига пора таклиф қилган шахс ушланди
Экология ва атроф-муҳитни муҳофаза қилиш соҳасидаги назорат бўйича инспекция ходимлари Янгийўл тумани ҳудудида ноқонуний қум-шағал қазиб олинаётганини аниқлашди.
Экология ва атроф-муҳитни муҳофаза қилиш соҳасидаги назорат бўйича инспекция ходимлари Янгийўл тумани ҳудудида ноқонуний қум-шағал қазиб олинаётганини аниқлашди.
Қонунчиликда белгиланган тартибда жарималар расмийлаштирилиб, қум-шағал қазишга жалб этилган техникалар вақтинча махсус жойга жойлаштирилди.
Лекин экоинспекторлар ҳузурида фуқаро Х. пайдо бўлиб, мазкур «бизнес» унга тегишли экани ҳамда шу ишни ими-жимида ёпишни сўрайди. Бунинг учун 4 000 АҚШ доллари миқдорида пора таклиф қилади.
Давлат экология қўмитаси ходимлари бу таклифни кескин рад этишади ва ҳуқуқни муҳофаза қилиш органларига мурожаат қилишади. Х эса уларга яна бошқа йўллар билан таъсир ўтказишга ҳаракат қилади. Натижада Х. экология ва атроф-муҳитни муҳофаза қилиш соҳасидаги назорат инспекторига пора беришга уринаётганда Давлат хавфсизлик хизмати ва Прокуратура департаменти ходимлари томонидан воқеа жойида қўлга олинди.
Ҳозирда ушбу ҳолат юзасидан тегишли идоралар томонидан дастлабки суриштирув ишлари олиб борилмоқда.
