Энг яхши бизнес университетлар аниқланди
Британия Кенгаши томонидан Ўзбекистон Республикаси Олий ва ўрта махсус таълим вазирлиги ва “Change School” билан ҳамкорликда мамлакатимиздаги олий ўқув юртлари учун ташкил этилган “Тадбиркорлик университети мукофоти” натижалари сарҳисоб қилинди.
Британия Кенгаши томонидан Ўзбекистон Республикаси Олий ва ўрта махсус таълим вазирлиги ва “Change School” билан ҳамкорликда мамлакатимиздаги олий ўқув юртлари учун ташкил этилган “Тадбиркорлик университети мукофоти” натижалари сарҳисоб қилинди.
Танловда учун Британия Кенгашининг “Creative Spark” дастури иштирокчилари бўлган 11 та етакчи университет саккизта номинация бўйича ғолиблик учун баҳслашди. Ғолибларни танлаш Буюк Британиянинг етакчи тадқиқот марказларининг ижодий-иқтисодиёт мутахассислари томонидан амалга оширилди.
– Ушбу ташаббус жамоаларнинг биргаликдаги ишларини намойиш этиш ва меҳнатнинг самараси учун ажойиб имконият. Ушбу тадбирда университетларнинг иштирок этиши жуда муҳим, чунки у ижодий фикрлаш, кооперация ва тармоқни ривожлантиришга ёрдам беради. Қолаверса, иқтисодий ривожланиш, иш билан таъминлаш ва янги корхоналар яратилишини қўллаб-қувватлайди, - дейди Ўзбекистондаги Британия Кенгаши директорининг ўринбосари Жамила Ғуломова.
Тошкент давлат техника университети “Йилнинг тадбиркор университети” мукофоти ғолиби бўлди. Университет талабаларнинг ғоядан тижоратгача бўлган лойиҳаларини қўллаб-қувватлаш учун “Йил мукофоти”, “Муқобил энергия манбалари” ўқув дастурини жорий қилганлиги учун “Яшил университет” каби учта номинация бўйича ғолибликни қўлга киритди.
Шунингдек, Тошкент тўқимачилик ва енгил саноат институти “Тўқимачилик”, Камолиддин Беҳзод номидаги Миллий рассомлик ва дизайн институти “Таъсир”, Тошкент давлат иқтисодиёт университети ҳамда Ўзбекистон давлат санъат ва маданият институти “Ўқув дастурида тадбиркорлик” номинациялари бўйича ғолиб, деб топилди.
Маълумот ўрнида айтиш жоиз, “Creative Spark” – бу Британия Кенгаши дастури бўлиб, у ёшлар ўртасида ижодий тадбиркорлик таълими, ишбилармонлик тафаккури ва ишбилармонлик кўникмаларини ривожлантириш учун олий таълим соҳасида икки томонлама ҳамкорликни мустаҳкамлашга қаратилган. Дастур МДҲнинг еттита мамлакатида ишлайди ва Буюк Британия минтақада ижодий иқтисодиётни ривожлантиришга ҳисса қўшади. Дастурда 110 та университет иштирок этади. Сўнгги уч йилда ҳудудда тадбиркорликни ривожлантириш дастури доирасида 750 мингдан зиёд ёшлар малака оширди, 65 ўқув курси ва 15 бизнес-инкубатор очилди.
