Наманган ҳокими сел ёпирилган Косонсой туманига келди
Наманган вилояти ҳокими Шавкат Абдураззоқов сел ёпирилган ва кучли дўл ёғган Косонсой туманига келди.
Бугун, 13 июль куни Қирғизистоннинг Жалолобод вилояти ҳудудида кучли ёмғир ёғиши натижасида сел оқимлари ҳосил бўлган. Ушбу сел оқимлари соат 13:35 атрофида Наманган вилоятининг Косонсой тумани, «Обод» МФЙ ҳудудидан ўтувчи Косонсой сойидан оқиб келган.
Ҳодиса оқибатида 8 киши ҳалок бўлган ва 6 нафар фуқаро жароҳат олган.
Шавкат Абдураззоқов табиий офат юз берган «Обод» маҳалласида бўлди.
Вилоят ҳокимига ФВБ, ИИБ, Миллий гвардия бошлиқлари ва прокуратура ходимлари ҳамроҳлик қилган. Улар маҳаллий мутасаддилар ва аҳоли билан мулоқотда бўлгани, ҳолатни кўздан кечиргани ва вазиятни ўргангани айтилмоқда.
Ҳозирда ҳудудда ФВВ қутқарувчилари томонидан қидирув-қутқарув ишлари амалга оширилмоқда.
