Қайта чақириқлар "Тез ёрдам" бригадаларининг манзилга кечикиб боришига сабаб бўлмоқда
Соғлиқни сақлаш вазирлигининг маълум қилишича аҳоли орасида “COVID-19” инфекцияси билан касалланиш ҳолатлари ортаётгани сабабли Тошкент шаҳар “103” тез тиббий хизматига келиб тушаётган кунлик чақириқлар сони ҳам ошиб бормоқда.
Республика Шошилинч тиббий ёрдам илмий маркази Тошкент шаҳар тез тиббий ёрдам станцияси бош шифокори Дониёр Бўрибоевнинг сўзларига кўра айни пайтда шаҳар “Тез ёрдам” хизмати CALL-марказига бир кунда ўртача 5000-5100 нафар фуқаро мурожаат қилмоқда. Жумладан, 8 июлдан-12 июлгача 26 минг 421 та чақириқ келиб тушган бўлса, шундан пневмония белгилари кузатилган, коронавирусга гумон қилинган ёки ташхис қўйилган ва бошқа юқумли касалликлар билан касаланган икки минг уч юз қирқ нафарга яқин беморга сифатли тез тиббий ёрдам кўрсатилди.
Аммо, кейинги вақтларда бир манзилга бир нечта жойдан қайта-қайта чақириқлар келиб тушмоқда. Яъни, битта беморга оила аъзолари, дўстлари, шунингдек, қўшнилари томонидан ҳам мурожаатлар қабул қилинмоқда. Айтиш лозимки, бу каби ҳолатлар пандемия даврида шундоқ ҳам тиғиз тартибда фаолият юритаётган тез тиббий ёрдам хизмати ишини янада қийинлаштириб, “103” бригадаларига юкламалар ортишига сабаб бўлаётир. Қолаверса, қайта чақириқлар туфайли битта манзилга бир вақтнинг ўзида иккита, учта, ҳатто, тўрттагача “Тез ёрдам” автомашинасининг бориб қолиш ҳолатлари кузатилмоқда.
Аҳолининг “103” хизматига мурожаатлари сони ошиб бораётганлиги сабабли шу кунларда шаҳар “Тез ёрдам” хизмати автопаркига олтмиш бешта янги автотранспорт воситаси олиб келинди ҳамда тиббиёт ходимларидан иборат қўшимча бригадалар ташкил этилди. Тошкент шаҳар “103” хизмати CALL-маркази операторлари сони қўшимча қирқтага оширилиб, жами саксон нафарга етказилди.
