Эмланган ҳар 1000 инсондан бор-йўғи тўрттасига vaksina ножўя таъсир кўрсатади ─ Нурмат Отабеков

 

 

Сир эмас, айни пайтда бутун дунё аҳолиси коронавирус инфекциясидан азият чекмоқда. Жаҳон соғлиқни сақлаш ташкилоти хабарига кўра вируснинг янги «delta» тўлқини ҳам тарқалишга улгурган. Вируснинг олдинги тўлқинлари даврида инсонларда фақат касалликка қарши вакцина топилиши ва бу орқали вирусдан холи бўлиш истаги бор эди.

Ниҳоят олимлар ва мутахассислар томонидан  яратилган ва патентланган турли вакциналар ишлаб чиқарила бошланди. Афсуски, ишлаб чиқарилаётган вакциналар миқдори эмланиши керак бўлган дунё аҳолисига қараганда анча кам. Ўзбекистонда ҳам коронавирус бўйича вазият сақланиб турганлиги рост. Вазиятнинг оғир ҳолатга келиб қолмаслиги учун мамлакатимизда ҳам уч ойдан буён аҳолини эмлаш ишлари олиб борилмоқда. Маълумотларга қараганда, шу кунгача юртимизга қарийб 7 миллион 600 мингга яқин вакцина олиб келинган.

Мамлакатимизнинг умумий аҳолиси эса 34 миллион 800 минг кишидан ошган. Аҳолининг 37 фоизга яқин 18 ёшгача бўлган қисми вакцина қабул қилмайди. Шу вақтгача юртимизга келтирилган ва захирада турган вакцина эмланиши керак бўлган аҳолининг қарийб 36- 38 фоиз қисмини эмлаш учун етарли экан. Қолган 60 фоиздан кўпроқ аҳоли эса вакцинанинг янги тўпламини олиб келинишини кутиши керак.

 Ижтимоий тармоқлар ва одамлар орасида тарқалган вакцина ҳақидаги ваҳимали хабарлар одамларни иккилантириб қўймоқда. Эмланишдан кейинги ножўя таъсирлар ва касалликни юқтириб олиш ҳолатлари ҳам бунга қўшимча бўлмоқда. Коронавирусга қарши курашиш штаби аъзоси Нурмат Отабековнинг айтишича, эмланган ҳар 1000 инсондан бор -йўғи тўрттасига вакцина ножўя таъсир кўрсатади. Вакцинадан кейинги қон босими кўтарилиши, иситма, мушаклар оғриши ва бошқа ҳолатлар кузатилиши  табиий ҳолат. Эмланган инсонларда вирусга қарши иммунитет ҳосил бўлиши бир ойдан тўрт ойгача давом этар экан.