Олимпия шаҳарчасида Ўзбекистон делегацияси штаби расман иш бошлади
Токио-2020 Олимпия шаҳарчасида мамлакатимиз делегациясининг штаби расман ўз ишини йўлга қўйди. Бу ҳақда Миллий олимпия қўмитаси маълум қилди.Олимпия қўмитаси раиси ўринбосари, Тезкор штаб бошлиғи Шерзод Тошматов бошчилигидаги жамоа асосий делегация ташрифига қадар барча масалаларни ҳал қилмоқда.
Бутун дунёдаги эпидемиологик вазият сабаб ижтимоий масофа, меҳмонларнинг саломатлиги жуда қаттиқ назорат остида бўлади. МОҚ вакиллари ҳозирда делегациямиз аъзолари учун хизмат қиладиган транспорт воситалари, улар яшайдиган ва ҳаракатланадиган ҳудудни ўрганиб чиқмоқда.
Мазкур гуруҳдан МОҚ Халқаро алоқалар департаменти директори Камолиддин Эргашев, Олимпия спорт турлари фаолиятини координация қилиш департаменти директор ўринбосари Ҳикмат Тошматов, Халқаро алоқалар департаменти бош мутахассиси Нозим Отақулов, Тезкор штаб аъзоси Мурод Чориев ва РСТИАМ шифокори, COVID-офицер Аъзамжон Солиев ўрин олишган.
Эслатиб ўтамиз, Токио-2020 Олимпиадасида иштирок этадиган делегациямизнинг асосий қисми 20 июль куни Олимпия шаҳарчасига кириб жойлашади.
Жамшид Амиро
