“Ўзбекистонга “Ламбда” штамми кириб келиш эҳтимоли мавжуд” — Нурмат Отабеков
Бугунги кунда Жанубий Америкада тарқалаётган коронавирус инфекциясининг 30 фоизи бевосита янги “Ламбда” штамми билан боғлиқ. Мазкур штамм бошқаларга нисбатан ўта юқувчанлиги, тез тарқалиши, оғирроқ ўтиши билан ажралиб туради. Аввалги штаммлар фақат бемор билан мулоқот асносида юқиши аниқланган бўлса, “Ламбда” штамми билан ҳатто беморнинг ёнидан ўтиб кетиш асносида ҳам касалланиш мумкин.
Жаҳон соғлиқни сақлаш ташкилотининг маълумотларига кўра, илк бор 2020 йилнинг декабрь ойида Перу, Эквадор, Аргентинада аниқланган “Ламбда” айни пайтга қадар дунёнинг 30 дан ортиқ мамлакатига тарқалиб улгурган.
Бу ҳақда пойтахтимизда ўтказилган “Вакцина — саломатлик ва чекловларсиз ҳаёт” мавзусидаги очиқ мулоқотда мутахассислар томонидан айтиб ўтилди.
— Айни пайтда юртимизда коронавируснинг бир қанча штаммлари аниқланган, — дейди Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков.
— Бугунги кунда Жанубий Америкада кенг тарқалаётган “Ламбда” штамми ҳам мамлакатимизга кириб келиши мумкинлигини ҳеч ким инкор қилолмайди. Вакцина ҳар қандай штаммга қарши самара бериши мумкин. Чунки бу штаммларнинг барчасининг асосида SARS-CoV-2 коронавируси ётади. Шу боис, одамларимиз, турли миш-мишларга ишонмасдан, албатта вакцина олиши, шу билан бирга карантин талабларига ҳам изчил амал қилишни тўхтатмаслиги шарт.
