75 млн сўмлик жиноят иши: «Сирожиддин медиа» раҳбари қамалди
У фирибгарлик ва товламачилик моддалари бўйича айбдор деб топилган.
Бугун, 5 октябрь куни Жиноят ишлари бўйича Мирзачўл туман судида блогер Сирожиддин Одиловга оид жиноят ишини кўриб чиқиш якунланиб, суд ҳукми эълон қилинди. Бу ҳақда Жиззах вилояти судлари матбуот хизмати хабар берди.
Суд ҳукмига кўра, фуқаро Одилов Сирожиддин Сайфиддинович 1 нафар фуқарога нисбатан Жиноят кодекси 165-моддаси 1-қисми ва 2 нафар фуқарога нисбатан 168-моддаси 3-қисми «б,в» бандлари билан боғлиқ жиноятларни содир этганликда айбли деб топилиб, 4 йил муддатга озодликдан маҳрум қилиш жазоси тайинланган.
Суд муҳокамаси давомида С.Одиловнинг Д.Шамсиевнинг 12 млн сўм пулини товламачилик, Г.Жуманиёзованинг 30 млн сўм, Р. Худойназарованинг 33 млн сўм пулларини фирибгарлик йўли билан қўлга киритганлиги тўлиқ исботланган ва С.Одилов томонидан жами 75 млн сўм етказилган зарар қопланган.
«Мазкур жиноят иши юритуви давомида С.Одиловнинг ижтимоий тармоқлардаги фаолияти юзасидан бирон-бир айблов қўйилмаган. С.Одиловнинг ҳаракатлари юзасидан айблов у томонидан бошқа фуқароларнинг мулки фирибгарлик ва товламачилик йўли билан қўлга киритилганлиги билан боғлиқ», дейилади хабарда.
