Қора денгизда кемада ёнғин чиқди: икки киши ҳалок бўлди

Қора денгизда, Руминиянинг ҳудудий сувларидан ташқарида Рояд Маммадов кемасида ёнғин чиқди. Ҳодиса оқибатида икки киши ҳалок бўлган, экипажнинг 11 нафар аъзоси қутқарилган. Бу ҳақда Руминия расмийларига таяниб Reuters хабар берди.

 

Руминия Ички ишлар вазирлиги қутқарилган 11 нафар экипаж аъзоси бўлган кемани чўкаётган кема сифатида таърифлаган. Мамлакат Денгиз маъмурияти эса ҳодиса айнан Рояд Маммадов кемасидаги ёнғин билан боғлиқлигини билдирган.

 

Расмийлар ёнғин келиб чиқиш сабабини маълум қилмаган. Руминия Денгиз маъмурияти вакили ҳам ҳодиса бўйича қўшимча маълумот бера олмаслигини айтган.

 

Руминия ОАВлари кеманинг Туркияга тегишли бўлгани ва дон ортилганини хабар қилган. Уларнинг маълумотига кўра, ҳодиса Руминиянинг ОМВ Petrom компанияси бошқарувидаги нефть платформаси яқинида юз берган.

 

VesselFinder.com маълумотига кўра, Цент-Китс ва Невис байроғи остида сузган кема Италиянинг Равенна портига йўл олган. Кема сўнгги бор Украинанинг Измаил портида бўлган.

 

Ҳозирча ёнғинга нима сабаб бўлгани, жумладан, кемага дрон зарбаси берилгани ҳақидаги хабарлар расмийлар томонидан тасдиқланмаган.

 

Руминия Украина билан 614 километр узунликдаги қуруқлик чегарасига эга. Россия-Украина уруши бошланганидан буён мамлакат ҳаво ҳудудига Россия дронларининг кириб келиши, шунингдек, Қора денгиздаги муҳим савдо ва энергетика йўллари бўйлаб миналарнинг сузиб юриши каби ҳодисалар кузатилган.