Ўзбекистонга жазирама кунлар қайтмоқда
24–26 июль кунлари Ўзбекистонга Эрон ҳудудларидан қуруқ ва иссиқ ҳаво оқими кириб келиши кутилмоқда.
«Ўзгидромет»нинг маълум қилишича, шу кунлари ҳаво ҳарорати иқлим нормаларидан 4–6 даражага юқори бўлади.
Республика ҳудудида кундуз кунлари ҳаво ҳарорати 41–44 даражагача, жанубий ва чўл зоналарида эса 45–46 даражагача исийди.
25–27 июль кунлари республика ҳудуди бўйлаб тезлиги 17–22 метр/сонияга етувчи шамол кузатилади, вақти-вақти билан шамол тезлиги 25–30 метр/сонияга етиши, чангли бўронлар юзага келиши мумкин.
Тошкент шаҳар ҳокимлиги аҳолидан зарурат бўлмаганда кўчага чиқмасликни сўради.
«Кескин иссиқ ҳавода барча инсонлар, айниқса, сурункали касаллиги бўлган, диспансер назоратида турувчи беморлар, ёш болалар, ҳомиладор аёллар ва кексалар ўзларини ҳимоялашлари ниҳоятда муҳим.
Бундай шароитда аҳолимиздан зарурат бўлмаганда кўчага чиқмасликларини, кўпроқ суюқлик истеъмол қилишларини сўраб қоламиз.
Ҳурматли ҳамшаҳарлар ва пойтахтимиз меҳмонлари, иссиқ ва қуруқ ҳавонинг салбий оқибатларидан ўзингизни асранг!» дейилади хабарда.
Эслатиб ўтамиз, 6–8 июль кунларида ҳам Эрон ҳудудларидан иссиқ ҳаво кириб келиши ҳисобига Ўзбекистонда ҳаво ҳарорати кўтарилган, ушбу кунларда ҳаво ҳарорати иқлимий меъёрлардан 5–8 даражага юқори бўлган эди.
Бугун, 23 июль куни Ўзбекистонда ўртача иссиқ об-ҳаво бўлиши кутилмоқда. Куннинг ўртасига келиб, ҳаво ҳарорати +37…+40 даражагача, шимолда, жанубда, чўл ҳудудларида баъзи жойларда +41…+43 даражагача исийди.
