Тошкентда “Тез ёрдам” хизматига бир кунда ўртача 4700 та чақирув келиб тушаётгани маълум қилинди
Жорий йилнинг қарийб 7 ойи давомида шаҳар «103» хизматига коронавирусга гумон қилинган, пневмония ва СОВИД-19 касаллиги тасдиқланган ҳамда бошқа юқумли хасталиклар билан жами 22 мингдан зиёд чақирув келиб тушган.
Бу ҳақда ССВ Матбуот хизмати Республика Шошилинч тиббий ёрдам илмий маркази Тошкент шаҳар тез тиббий ёрдам станцияси бош шифокори Дониёр Бўрибаевнинг сўзларига таяниб маълум қилди.
Дониёр Бўрибаевга кўра, июль ойининг 28-санасига қадар “Тез ёрдам” хизматига мурожаат қилган 12 минг 38 нафар катта ёшли ва 895 нафар 18 ёшгача бўлган ана шундай беморларга сифатли тез тиббий ёрдам кўрсатилган.
– Айни пайтда шаҳар «103» хизмати САЛЛ-марказига бир кунда ўртача 4700 нафар фуқаро мурожаат қилмоқда. Жумладан, сўнгги 10 кун ичида (19 июлдан – 28 июлгача) 46 минг 569 та чақириқ келиб тушган бўлса, шундан пневмония белгилари кузатилган, коронавирус ташхиси қўйилган ва бошқа юқумли касалликлар билан 12 минг 933 нафар беморга сифатли тез тиббий ёрдам кўрсатилди, – дейди РШТЁИМ Тошкент шаҳар бўлими шифокори.
Қайд этилишича, бунда фуқаролар, асосан, тана ҳароратининг ошиши, бош оғриғи, нафас олишнинг қийинлашиши, кўнгил айниши, қон босимининг кескин кўтарилиши каби симптомлар билан мурожаат қилмоқда.
ССВ фуқароларга ҳароратнинг кўтарилиши фақат коронавирус инфекцияси ёки пневмониянинг симптоми эмаслигини эслатиб, улардан “Тез ёрдам”га мурожаат қилишда буни инобатга олишларини сўрамоқда.
“Одамнинг истимаси 37-37,5 ёки 38 даражага чиқиши билан дарров аҳволи оғирлашиб қолмайди. Шу боис, халқимиз буни тўғри тушуниши, агар шундай бўлган тақдирда, энг аввало, оилавий шифокорга мурожаат қилиши ва унинг тавсияларига риоя этиши зарур”, – дейилади ССВ маълумотида.
Маълум қилинишича, айни вақтда шаҳар «103» хизмати САЛЛ-маркази операторлари сони қўшимча 40 нафарга оширилиб, жами 80 нафарга етказилган.
