''Glamour'' бутиги маъмурияти давлат рамзлари акс этган коллекция учун узр сўради

 

Пойтахтимиздаги Glamour бутигида Стефано Риччи томонидан Ўзбекистон давлат герби ва байроғини қўллаган ҳолда яратилган янги коллекция сотувга чиқарилгани ҳақида хабар қилган эдик  .

 

Италиялик машҳур дизайнер Стефано Риччининги УЗБ коллекциясидаги кийимларда Ўзбекистон Республикасининг Давлат байроғи ва Давлат герби рамзлари акс этган.

 

Ўз навбатида, Адлия вазирлиги давлат рамзларининг оёқ кийим ва турли либосларда қўлланилиши ҳолатини «давлат рамзларига ҳурматсизлик» деб баҳолади .

 

Шундан сўнг, Стефано Риччи брендидаги маҳсулотларни сотувга чиқарган Glamour  бутиги маъмурияти ўзининг Инстаграмдаги саҳифаси орқали ҳолат учун узр сўраб чиқди.

 

Хусусан бутик маъмурияти шундай деб ёзади: “Биз ўзимизнинг узоқни кўра билмаслигимиз сабаб юзага келган вазиятдан афсусдамиз ва кроссовкаларнинг мамлакатимиз рамзлари туширилган ҳар қандай модели буюртмасидан воз кечамиз”.

 

Дўкон ходимлари мазкур коллекция фақат буюртма учун яратилганини ва оммавий сотув учун мўлжалланмаганини қайд этишди.

 

Маълумот учун, Ўзбекистон герби ва байроғи тасвири туширилган оқ рангли оёқ кийимнинг нархии 18 млн сўм, кўк ранглиси эса 24 млн сўм экани айтилганди .