Вакцина олган аёллар ҳомиладор бўла олади
Узоқ кутилган оналик бахти остонасида турган бўлажак она ҳам ўзининг, ҳам туғилажак фарзандининг саломатлиги ҳақида қайғуради.
Шу сабабли, ҳомиладорлик даврининг кечиши ҳақидаги барча тиббий маълумотлар унда ўзгача қизиқиш уйғотади. Дунёда коронавирус инфекциясининг тарқалиши бошқаларга нисбатан ҳомиладор ва эмизикли аёллар учун ўта ҳушёр ва огоҳ бўлишни талаб этмоқда. Бугун юртимизда барча COVID-19 инфекциясига қарши эмланяпти. Аммо ҳомиладор ва эмизикли аёллар, бундан мустасно. Уларнинг нима учун эмланмаётганини Инновацион ривожланиш вазирлиги ташаббуси билан ташкил этилган матбуот анжуманида вазир ўринбосари Шаҳло Турдиқулова қуйидагича изоҳлади:
«Ҳомиладор ва эмизикли аёлларнинг эмланмаётганининг асосий сабаби — коронавирусга қарши вакциналарнинг клиник синовлари бундай аёлларда ўтказилмаган. Чунки Жаҳон соғлиқни сақлаш ташкилоти талабига кўра, клиник синовлар аҳолининг қайси қатламида ўтказилган бўлса, вакциналар ҳам ўша қатлам орасида қилиниши лозим.
Бундан ташқари, бугунги кунда бу борада бутун дунё олимлари, хусусан, ўзимизда ҳам эмизикли аёлларни эмлаш бўйича ўрганишлар олиб борилмоқда. Масалан, эмизувчи ҳайвон — сигирларда вакциналар синовдан ўтказилди. Ҳозирча ҳеч қандай ножўя таъсир сезилмади. Эмланган сигир сутида антитаначалар топилди. Бу — эмизувчилар эмланган тақдирда, касалликка қарши иммунитет унинг боласига ҳам ўтади, дегани.
Коронавирусга қарши эмлангандан кейин ҳомиладор бўлган аёллар ҳомиладор бўла олади. Юртимизда бундай аёллар бор ва уларнинг аҳволи мунтазам назорат қилиб борилмоқда. Дастлабки эмлаш босқичларидан буён 7–8 ой вақт ўтди ва шу давр мобайнида бирорта аёлда ножўя таъсир кузатилмаган. Энг муҳими — вакцина олгани уларнинг ҳомиладор бўлишига ҳеч қандай тўсқинлик кўрсатмаган.”
Баҳринисо МАДУМАРОВА
