Зоминда бугун ҳам ёнғин юзага келдими?
Бугун ижтимоий тармоқларда Зомин тоғлари яна тутунга бурканаётгани акс этган видео лавҳа тарқалди.
Ҳолат юзасидан Zamon.uz Жиззах вилояти ФВБ матбуот раҳбари Фаррух Абдураҳмонов билан боғланди. Ходимнинг маълумот беришича, бугун Зоминда ҳеч қандай ёнғин ҳолати қайд этилмаган. Куни кеча олов ичида қолган ҳудудларда шахсий таркиб тозалаш ишларини олиб боряпти. Қолаверса айни манзил 24 соатлик назоратга олинган.
“Видеога келадиган бўлсак кеча юзага келган ёнғин қолдиқлари бугун ҳам тутамоқда, бу табиий ҳолат”,- дейди Жиззах вилояти ФВБ матбуот раҳбари.
Маълумот ўрнида кеча, 1 август куни Жиззах вилояти Зомин тумани «Дуоба» ҚФЙ Ўриклисой қишлоғи ҳудудидаги дала майдонида ёнғин содир бўлди. Вилоят фавқулодда вазиятлар бошқармасига соат 10:40 ларда ёнғин ҳақида хабар тушган.
Ёнғин жойига 4 та ёнғин-қутқарув бўлинмаси ҳамда 24 нафар шахсий таркиб юборилган.
Соат 14.30ларда эса Зоминда ёмғир ёғишни бошлаган ва ёнғин бартараф этилган .
