“Мени қайнотам билан ўйнаш қилишда  айблашди, шу сабаб келинлик уйимдан кетиб қолдим”

 

Унинг бузилишига ёш оила вакилларининг никоҳга бўлган масъулиятсизлиги, фарзанд тақдирига бўлган лоқайдлиги ёки ўртага учинчи шахснинг аралашуви  сабаб бўлмоқда. Бугунги  мавзуйимиз ана шу ҳақда.

Zamon.uz cайтига Тошкент шаҳар Яшнобод туман “Фазогир” маҳалласида истиқомат қилаётган фуқаро Феруза Салимовадан мурожаат келиб тушди. Унинг айтишича,  оиласи ажрим ёқасида экан. Сабаби эри бошқа аёлни танлаб кетган.   Ҳозирда 3  фарзанди билан уйсиз-жойсиз, сарсон-саргардон бўлиб юрибди.  Оиласини тиклашда биздан ёрдам сўраган.

—2011 йил 9 сентябрда турмушга чиққанман. Турмушимдан 3 та фарзандим бор. Эрим жуда кўп хиёнат қилади. Тўғриси қийналиб кетдим. Эримдан жуда кўп зулм кўрдим. Фарзандларимни деярли боқмайди, қарамайди.  Ҳозир икки йилдан буён онамнинг уйида яшайман. Суд 3  фарзандимга 1 миллион 200 минг сўм алимент чиқариб берди. Қайнонам 81 мактабда рус тили ўқитувчиси  бўлиб ишлайди.  Эрим алиментни кўп тўлаётгани учун қайнонам уни мактабга  супурувчи қилиб жойлаштириб қўйди. Шундан кейин  алиментим 723 мингга тушди.

—Алимент борасида  турмуш ўртоғингиз билан келишишга ҳаракат қилдингизми?

—Ҳа, ҳаракат қилдим аммо эшитишни истамади. Қонунан биз ҳамон  эр- хотинмиз. Суд бизни 3 фарзандимиз борлиги учун ажратмади. Яна вақт берди. Мен оиламни сақлаб қолиш учун роса ҳаракат қилдим, аммо эрим мен билан яшашни истамаяпти. Уйига бир қизни олиб келиб шаърий никоҳ асосида яшаяпти. Охирги марта Андижонлик Мафтуна деган  қиз билан яширинча учрашиб юришганини сезиб қолдим. Шу қизни деб эрим билан олти ой курашдим. Охири оиламни сақлаб қолиш учун ўша қизни эримга иккинчи хотин қилиб олиб беришга рози  бўлдим.  Эвазига фақат болаларимни уй-жой билан таъминлаб беришини сўрадим, холос.

—Турмуш ўртоғингиз  ваъдасида турдими?

—Йўқ, турмади.  Барибир мени уйдан ҳайдаб чиқаришга уринди. Уй тўловларини атай тўламади, қарзга ботиб кетдик.  Газга тўлов қилмаганимиз учун газ қувурини кесиб кетишди. Ўзим ишлай десам учинчи  фарзандим ҳали жуда ёш. Болаларим  қишда газ йўқлигидан бир неча бор  касал бўлиб қолишди. Мен ўша уйдан кетганимдан кейин  шароит яхшиланиб, йўқ газ  уланди.  Менга алам қиладигани ахир фарзандларим унинг ҳам боласи-ку, наҳотки раҳми келмайди....

Кичик ўғлим касал бўлиб қолганида эрим ўша аёл билан касалхонага  кўргани келди. У билан гаплашиб кўрдим. Эримни тинч қўйиш нияти йўқ.

—Аввал ҳам ота уйингизга шунақа кўп кетиб қолган ҳолатлар бўлганми? 

—Бундан 4 йил аввал  қайнонам мени раҳматли қайнотам билан  ўйнаш қилди, деб туҳмат қилганида 4 йилга кетиб қолганман. Ҳозир ота-онамнинг  2 хоналик уйида яшайман.  Уйимиз жуда тор. Укам уйланиши керак. Мени деб уйлана олмаяпти. Қийналяпман, эрим фарзандларимни таъминлашини истайман.

Ҳолат юзасидан биз мурожаатчи келин бўлиб тушган Учтепа тумани “Пахтакор” маҳалласи раиси ўринбосари Дилбар Ҳожимуротова билан боғландик.

—Ҳа, бу қизимиз ёрдам сўраб бир неча бор мурожаат қилган. Ўшанда турмуш ўртоғим калтаклагани учун кетаяпман, деган. Биз ушбу оила билан  тушунтириш ишлари олиб борганмиз. Яраштирув комиссияси билан уч марта кўриб чиққанмиз.  Ферузага қонунан  бу уйга ҳақли эканлигини тушунтирганмиз. Дарҳақиқат, бу оила нотинч оила сирасига киради. Ўзларида ҳам айб бор: йиллаб ота уйига кетиб қолган. Яна бир жиҳатга эътибор қаратишингизни  истардим. Мен турмуш ўртоқлари билан гаплашиш  учун бир неча бор уйларига бордим, уйида ҳеч қандай бегона ёки шаърий никоҳдаги аёл борлигига гувоҳ бўлмадим.  Қўшниларидан ҳам суруштирдим, эри уйланмаган экан.

Тоҳир Салимов,  Ферузанинг турмуш ўртоғи.

—Ферузанинг ҳамма гапи ёлғон. Барчасига унинг ўзи айбдор.  У яхши бўлганида, аввало, уйдаги гапни кўчага олиб чиқмасди. Агар унга оила керак экан онасиникига югуриб кетавермай эшигим тагига бориб ўтириб олган бўларди. Мен унга бир неча бор  “Агар кетсанг, қайтиб келма”, деб айтганман.   У бўлса чиқиб кетди. Энди қайтиб келмасин. Кўришни ҳам истамайман. Қайтаришга уйига бордим, келишни  истамади. Унинг дарди оила эмас, пул ва уй-жой. 

—Ажрашишингизга нима сабаб бўляпти?

—Мен унга ишонмайман. Отам тириклигида онам уларни ётоқда ушлаб олган экан. Шуни кечиролмайман. Яна бир ҳолат,ўша вақтда 54 ёшли   бир эркак билан телефонда гаплашганида ҳам ушлаб олганман. Телефонини тиктилаб ўша одамни топиб уйига борганман. Ўша эркак хотиним билан гаплашганини тан олди. Уйланиш истаги борлигини айтди. Шундан кейин ҳайдаб юбордим. Қолаверса, тарбияси ҳам яхши эмас. Уйдаги гапни кўчага 

ташийди. Фарзандларимни кўришга борсам отасидан бекитиб кўрсатади.  Отаси кўриб қолса, болаларни уйига олиб кириб кетади.  Менинг кўришимни исташмайди. Аёл кишининг биринчи  вазифаси эрининг кўнглини олиш. Бу эса фақат ота-онаси ва болаларини ўйлайди. Шунинг учун мен у билан яшашни истамайман.  Аслида мен унга мажбур бўлганимдан уйланганман. Тўйдан олдин орамизда муносабат бўлган. Менга болаларимни берсин, ўзим боқаман,  ўзи эса керакмас.

Биз қаҳрамонимиз Ферузага ёрдам бериш мақсадида юристларни жалб қилдик.  Психологик ёрдам кўрсатдик.  Қонун у томонда эканлигини ҳамда эрининг хонадонига ўзини ва болаларини киритиб қўйиш учун фуқаролик судига ариза билан мурожаат қилиш кераклини тушунтирдик.

Орзу ҳавас билан қурилган оилага бугун дарз кетяпти. Сабаб эса ўзаро ишончнинг йўқлиги.  Биз ёшларнинг фикри ёки характери  бир-бирига тўғри келмаслигини оилавий ажримларнинг асосий сабабларидан бири  сифатида биламиз. Лекин мана шундай ҳолатда оилани сақлаб қолишга уларга нима халақит беради. Бири-бирининг сирини очиб, шарманда қилгандан кўра,  муаммосини ечса, уни сақлаб қолиш мумкин-ку. Муаммоли оилада ўсган болалар  ҳаётга ҳам бошқача нигоҳ билан қарайди. Халқимиз қуш уясида кўрганини қилади, деб бежиз айтмаган. Хулоса эса ўзингиздан.

Муножат Валиева