“Оиламни сақлаб қолиш учун аёлимнинг хиёнатини кечиришга тайёрман”
Таҳририятимизга Тошкент шаҳар Учтепа туманидан Комилжон Ибрагимов мурожаат йўллади.
У ўз мурожжатида оиласи бузилаётгани, сақлаб қолиш учун қўлдан келганича ҳаракат қилаётгани, аммо рафиқасининг у билан ярашиш истаги йўқлигини билдирган. Фарзандларини кўриш учун ёрдам сўраган. Биз у билан боғланиб, муаммосини ўргандик.
Комилжон Ибрагимов:
— Аёлим билан 2002 йилда севишиб оила қурдик. 3 йилдан сўнг оиламни уйга ташлаб ўзим ишлаш учун Кореяга кетдим. Бу орада аёлим ўзидан 8 ёш кичик бўлган йигит билан юриб кетган. Яқинларим айтишганида дастлаб ишонмаган эдим. Ўзбекистонга қайтиб келганимдан кейин уларни ўз қўлим билан ушлаб олдим. Аввалига тан олишмади, кейин йигит икки йилдан буён аёлим билан учрашиб юришини айтди. Ундан 2 қизим бор. Бири 18, иккинчиси16 ёш. Кейин ажрашиб кетдик.
— Кейин оила қурдингизми?
—Ҳа, бошқа оила қурдим, у билан 7 йил бирга яшадик. Яна иккита фарзандлик бўлдим. Афсуски бу оилам билан ҳам муаммо пайдо бўлди: у ҳам менга хиёнат қилди.
— Иккинчи бор ҳам хиёнатга учрадим, деяпсиз ҳолатни қандай қабул қилдингиз?
—Иккинчи аёлимнинг хиёнатини билгач, ўша куни уйга келиб хумордан чиқгунча дўппосладим. Мени судга берди. Жазойимни ҳам олдим.
Ҳозирда иккинчи оиламдан туғилган икки ўғлимни қайтариб олишга харакат қиляпман. Лекин оиламни тиклаш учун хиёнатини кечиришга тайёрман. Чунки уни севаман.
—Қонуний никоҳдамисиз?
—Йўқ, шаърий никоҳдамиз. Негаки қайнонам бунга йўл қўймади. Сабаби доимий рўйхатда турган уй яқин орада бузилиши кераклигини, шу орқали унга алоҳида уй бериш мумкинлигини айтган эди.
Қолаверса, болаларимни соғиндим. Уларни кўргани борсам аёлим кўрсатишни истамади. Жаҳл устида алимент тўлашдан бош тортдим.
Мурожаатчи ҳикоясидан келиб чиқиб табиий савол туғилади: қонунчилигимизда хиёнатга учраган эркак фарзандларини олишга ҳақлими?
Одилбек Хазратқулов, Миробод туман фуқаролик ишлари бўйича суди судьяси:
—Хиёнат, ажрим ёки алоҳида яшаш фарзандларга бўлган ҳуқуқни чекламайди. Лекин шундай суд жараёнлари ҳам борки, унда фарзандларни яшаш жойини белгилаш ёки фарзанд билан учрашишда психологлар жалб қилини,б фарзандлар фикри ҳам эшитилади.
Биз мавжуд муаммога ижобий ечим топиш мақсадида мурожаатчининг рафиқалари билан ҳам боғланишни лозим топдик
-Севара Фарходова, биринчи рафиқаси:
—Эрим 10 йил давомида Кореяда ишлади. Биз бу ерда ёлғиз қолиб кетдик. Ўзбекистонга келишидан 2 йил аввал телефон орқали талоғимни берди. Мен хиёнат қилмаганман. Қайтишини 10 йил кутдим. Лекин бизни умуман моддий жиҳатдан таъминламай қўйди. Қийналганимдан ишга чиқиб кетдим. Эвазига бесабаб туҳматга қолдим. Талоғимни олгач, бошқа инсонга турмушга чиқдим.
-Комола Жабборова, иккинчи рафиқаси:
—Фарзандларим ва мендан бирор марта келиб хабар олмади. Охирги марта янги йил куни келди. Болаларимнинг меҳри йўқ. Бу одамдан менга ҳеч нарса керакмас. Мен бу одам билан яшашни истамайман. Доим бошимга уради. 7 йил давомида калтагини еб чарчадим. Мени хиёнатда айблаб, бошимни уриб ёрди, икки марта операция бўлдим. Бирор марта келиб хабар олмади. Алимент ҳам тўламайди.
-Нега алиментга ариза бермадингиз?
-Қонуний никоҳим йўқлиги учун.
-Оила қурганингизга 7 йил бўлибди нега шу вақт ичида қонуний никоҳдан ўтмадингиз?
-Мен ҳали синовда эканлигимни, синовдан ўтсамгина қонуний оила қуришим мумкинлигини айтган. Назаримда умуман истамаган, мени алдаб келган. Биринчи аёли судга бериб қонуний уй талаб қилган. Мени ҳам шундай қилади, деб ўйлаган бўлса керак.
Турфа одамлар, турфа тақдирлар... Бундай пайтда нима дейишга ожиз қоласан. Уларни тинглаб, кимга ишониш, кимнинг тарафини олишни ҳам билмайсан. Лекин шундай бўлса-да, бир ҳақиқатдан кўз юмиб бўлмайди: оила муқаддас, унга енгил-елпи қараб бўлмайди. Қолаверса, ўртада бегуноҳ болалар бор.Уларнинг эртасини ўйлаш сиз билан бизнинг зиммамизда. Уларнинг гуноҳи не?..
Муножат Валиева
