“Дрифт”чиларга қандай чора бор?
Автоспорт оламида ҳеч қандай рақобат ҳаддан ташқари ҳайдашсиз ўтмайди. Баъзи ҳолларда ўта юқори тезлик қадрланади, бошқаларда — бурилиш аниқлиги. Бироқ экстремал ҳайдашнинг битта тоифаси мавжуд — дрифт.
Дрифт, аслида, мусобақа! Унда ким ўзарга ҳайдаш, бурилиш муҳим роль ўйнайди. Бироқ бу мусобақанинг ўз ўрни, ўз жойи бор.
Куни кеча тунги 23:30 лар атрофида Тошкент шаҳар Сирғали 4 мавзесида номаълум шахслар томонидан 2 та автомобиль кўп қаватли уйлар олдида катта тезликда айланиб, дрифт пойгасини уюштирган. Табиийки, бу ҳолат аҳоли томонидан катта эътирозга сабаб бўлган.
Албатта, аҳоли яшаш жойларида бу каби трюкларни бажариш тақиқланган. Бироқ шундай бўлса-да, сўнги пайтларда бу каби ҳолатлар пойтахт кўчаларида тез-тез содир бўлмоқда. Хўш, бу каби хавфли ҳолатларда қонунчилигимизда қандай чоралар белгиланган?
Тошкент шаҳар ЙҲХБ катта мутахассиси Шодмон Сафаров:
“Сўнги вақтларда автоуловнинг экстремал турларини ёқтирадиган орасида, расмийларнинг тақиқларига қарамай, дрифтинг машҳурлик касб этмоқда. Бу ҳолат ўзгаларнинг ҳаётини хавф остига қўйиб, йўл транспорт ҳодисаси содир этилишига сабаб бўлиши ҳеч гап эмас. Шу сабаб, хавфли ҳолат содир этилган одамнинг шахсига аниқлик киритилади. Амалдаги қонунчилигимизга биноан транспорт воситасини хавфли ҳолат содир этиб бошқаришда айблаб, Маъмурий жавобгарлик тўғрисидаги кодекснинг 128-моддаси 5-қисми билан маъмурий баённома расмийлаштирилади. Шунингдек, транспорт воситаси жарима майдончасига жойлаштирилади”.
