Фуқаролар мурожаати эътиборда
Ҳар бир фуқаро мутасадди ташкилотларга шунчаки мурожаат этмайди. Унинг ҳуқуқи бузилса, муаммоларига узоқ муддат ечим изласаю, топа олмаса, сарсонгарчиликлар жонидан ўтсагина ташкилот эшигини тақиллатиб боради.
Улардан умид, нажот кутади. Бу борада Адлия вазирлиги ва унинг ҳудудий бошқарма, бўлимлари томонидан олиб борилаётган саъй-ҳаракатлар кўплаб мурожаатчиларнинг кўнглига таскин, хотиржамлик улаша оляпти.
Нафақадаги шифокор аёлнинг иши тикланди
Саломатхон Йўлдошева ота-онаси ва яқинларидан жуда эрта айрилган. Укасига бош-қош бўлиш унинг зиммасига улкан масъулият юклаган. Шу боис укасини ўйлаб, турмуш ҳам қурмаган. Укаси ва ўзини боқиш учун тиним билмай ишлаган. Шу билан бир вақтда университетда ўқиб, олий маълумотли ҳам бўлади.
Ҳозир нафақада бўлишига қарамай, рўзғор камчиликларини тўлдириш учун ишлашга мажбур. Укаси ва жиянларига бўлган муҳаббат ва масъулият аёлни бунга ундайди.
Саломатхон опа иш фаолияти давомида оилавий поликлиника, шунингдек, корантин пайтида Covid марказларида ҳам ишлади. Уни ҳаёт яна бир бор синади. У кўп йиллик фаолиятидан сўнг оилавий поликлиника бош шифокори Саломатхон опанинг нафақа ёшидалигини рўкач қилиб, унинг розилигисиз иш стажидан 0,25 ставка қисқартириб, бошқа бир одамга иш жойи яратиб беради. Аммо С.Йўлдошевага иш жуда зарур, маблағ унданда керак эди.
Имконсиз қолган шифокорУчкўприк тумани адлия бўлимидан ёрдам сўраган. Натижада, фуқаронинг ҳақ-ҳуқуқлари тикланиб, ташкилот томонидан унга ёрдам берилди.
Ҳужжатда бошқа, ҳаётга бошқа
Жумагул Бобохўжаева туғилганида ота-онаси унга Жумагул деб исм қўяди. Ҳужжатларда ҳам худди шундай рўйхатдан ўтказилган. Бироқ онаси уни Раънохон деб атарди. Шундан бери ҳамма уни Раънохон исми билан танийди. Ҳатто ҳужжатларда исми бошқа эканини деярли ҳеч ким билмайди. Шу сабабдан у йиллар давомида фаолият юритган корхона ва ташкилотларда исм-шарифи Раъно Бобохўжаева тарзида киритилган. Меҳнат дафтарчаси ҳам шу тарзда юритилган.
Паспортида келтирилган исм билан меҳнат дафтарчасидаги исм турлича бўлгани туфайлии Жумагул Бобохўжаева нафақага чиқиш давомида қийинчиликларга дуч келди. Шу боис у туман Адлия бўлими ходимларидан муаммога ечим топишда кўмак сўрайди. Бўлим ходимлари томонидан фуқаролик ишлари бўйича туман судига даво аризаси тақдим этилиб, муаммога ечим топилди.
