Жавоблар варақаси хато текшириляпти(ми)?
Ижтимоий тармоқларда айрим абитурийентларнинг жавоблар варақалари келтирилган ҳолда сканер қурилмалари хато ишлаяпти деган мазмунда фикрлар билдирилмоқда. Бунга Давлат тест маркази изоҳ берди.
Хабарга кўра, бир нечта жавоб белгиланганда улардан бири тўғри жавоб сифатида олиниши АҚШнинг SCANTRON корпоратсиясининг iNSIGHT туркумига кирувчи оптик қурилмаларининг дастурий таъминоти ва махсус алгоритми билан боғлиқ бўлиб, бу ҳолат хато ҳисобланмайди.
Яъни мазкур қурилмалар жавобни ўқишда айлананинг бўялганлик ҳолатини текширади ва каттароқ бўялган айлана белгиланган жавоб сифатида олинади. Айланаларнинг бўялганлик ҳолати бир-бирига яқин бўлганда эса бирдан ортиқ жавоб белгиланган ҳисобланади ва тест топширувчига мазкур тест топшириғи учун балл берилмайди.
Умуман олганда SCANTRON корпоратсиясининг оптик сканерлари дунёдаги энг ишончли қурилмалардан ҳисобланиб, АҚШ, Япония, Туркия каби ривожланган давлатлар ҳам айнан шу қурилмалардан фойдаланади.
Шунингдек, ижтимоий тармоқлардаги бундай ҳолатни Давлат тест маркази ўз устидан беписандлик билан қилинаётган ҳақорат деб қабул қилишини ҳам таъкидлаган.
Эслатиб ўтамиз, аввалроқ тест синови жараёнида аниқланаётган ҳолатлардан намуналар берилганди ҳамда ДТМ тест материаллари тарқалаётгани юзасидан изоҳ берганди.
