МИБ: Болалар она тарбиясига олиб берилди

 

Оилада тинчлик-хотиржамлик, фарзандлар тотувлиги бўлса, жамият ҳам ўз-ўзидан фаровон бўлади.

 

Лекин афсуски, сўнги вақтларда бўлаётган оилавий ажралишлар фарзандлар тақдири ҳамда уларнинг келгусида ота ёки она билан қолишлари, таъминоти каби оғриқли саволларни кун тартибига чиқариб қўяётганлиги ҳеч кимга сир эмас.

 

Сирдарёлик  Саҳобовлар (фамилияси ўзгартирилган) оиласи ҳам ўн уч йил муқаддам яхши орзу-умидлар билан оила қуришган. Ўтган вақт оралиғида оилада 3 нафар фарзанд дунёга келган.

 

Шундай улуғ неъматга шукрона келтириш, фарзандларини ҳар жиҳатдан комил инсонлар этиб тарбиялаш ота-онанинг асосий бурчи эди. Бироқ, эр-хотиннинг келишмовчиликлари сабаб оила пароканда бўлди. Фарзандлар эса сарсон-саргардон, аро ё‘лда қолди. Уларнинг тарбияси, саломатлигига ким қайғуради?

 

Шундай вазиятда она судга мурожаат қилди. Фуқаролик ишлари бўйича Сирдарё туманлараро судининг 06.07.2021 йилдаги қарорига асосан, қарздор Д.С.дан  вояга етмаган фарзандлари 2009 йилда туғилган О.З, 2011 йилда туғилган Н.З, 2016 йилда туғилган А.З.ларни онанинг тарбиясига олиб бериш ҳақида қарор қабул қилди.

 

Ушбу ижро ҳужжати Мажбурий ижро бюроси Сирдарё туман бўлимига келиб тушгандан сўнг, давлат ижрочиси томонидан ижро ишини юритиш тўғрисидаги қарор қабул қилиниб, тарафларга маълум қилинган ҳамда қарздорга ижро ҳужжати бўйича ҳуқуқий тушунтиришлар берилиб, 3 нафар вояга етмаган бола онаси С.С.нинг тарбиясига олиб берилди.

Бироқ энди оилада, айниқса, фарзанд тарбиясида отанинг ўрнини ким босади?! Минг афсуски, уч фарзанд дунёга келгунча бир-бирини тушуна олмай, оилага кўника олмаётган бу каби оилалар ҳаётда учраётгани ачинарлидир. Надоматли жиҳати шундаки, ўртада бегуноҳ фарзандлар сарсон.

 

П.Р.Розимов,
Бюронинг Сирдарё туман бўлими давлат ижрочиси