Борис Жонсон: “Толибон”ни қонуний ҳаракат сифатида тан олинишига йўл қўйиб бўлмайди”

 

 

Жонсон “Толибон”нинг конунийлигини бир томонлама тан олиш ножоиз қадамлигини айтиб ўтди.

 

“Биз алоҳида давлатлар ва “Толибон” ўртасида расмий муносабатлар ўрнатилишини хоҳламаймиз” ,- деган Британия бош вазири.

 

Шунингдек, Жонсон бу масалада БМТ ва НАТО биргаликда ҳаракат қилиши лозимлигини айтиб, Афғонистонда ҳокимият алмашгани ҳамда мамлакат сиёсий келажаги мавҳум қолаётганини таъкидлади. Буюк Британия Бош вазири “Ҳеч ким Афғонистоннинг террор ўчоғи бўлишини ёки яна 2001 йилгача бўлган вазиятга қайтишини истамайди”, - деб айтиб ўтган.

 

Буюк Британия мудофаа вазири Бен Уоллес ҳам вазиятга муносабат билдирар экан, энг аввало Британия Афғонистонга бошқа қайтмаслигини таъкидлади. Шунингдек, мутасаддининг фикрича, ҳозирги вазиятда қўшни мамлакатларга афғонистонлик мигрантлар оқими янада ошиши мумкин.

 

15 август куни “Толибон” ҳаракати Кобулни эгаллади. Шундан кейин шаҳардаги барча муҳим нуқталар, жумладан, Президент саройи ҳам  ҳаракат назоратига ўтди. Афғонистон президенти Ашраф Ғани мамлакатни тарк этди.

 

Президент саройида ўтган музокаралар натижасида Афғонистонда ҳокимият координацион кенгаш қўлига ўтиб, унга Афғонистон собиқ президенти Ҳамид Карзай, Миллий ярашув кенгаши бошлиғи Абдулла Абдулла аъзо бўлиб кирган.

 

Сўнгги маълумотларга кўра, Афғонистондаги сиёсий ҳокимият “Толибон” нинг Доҳадаги Сиёсий офиси раҳбари Мулла Абдулғани Бародарга ўтиши кутилмоқда.

 

 

Жаҳонгир Қўзиев