Президенти ўлдирилган мамлакатда зилзила оқибатида бир ярим минг бино қулади

 

Етказилган моддий зарарнинг аниқ суммаси ҳозирча маълум эмас.

 

Сўнгги хабарларга кўра, зилзила оқибатида 1300 га яқин инсон ҳалок бўлган ,  6 мингдан  ортиғи жароҳатланган. Гаити қутқарув хизмати раҳбари Жерри Чандлернинг маълум қилишича, шифохоналар зилзиладан жабрланганлар билан тўлиб кетган. 1,5 минг бинолар тўлиқ вайрон бўлган, 5 мингдан ортиғи турли даражада зарар кўрган.

 

“Ҳозирда энг муҳим масала-бу тиббий ёрдам. Биз зилзиладан зарар кўрган ташкилотларга дори воситалари ва тиббиёт ходимларини жўнатишни бошладик. Ёрдамга муҳтожларнинг бир қисми эвакуация қилинган, жараён бугун ва эртага ҳам давом этади”,-деб маълум қилган Гаити бош вазири Ариель Анри.

 

Гаитидаги нотинч сиёсий вазият тиббий ёрдамнинг ўз вақтида етказилишига тўсқинлиқ қилаяпти. Масалан, пойтахт Порт-о-Пренс шаҳридаги Мартессан тумани қуролли тўдалар томонидан назорат қилинади ҳамда улар шаҳардан жўнатилаётган гуманитар юкларни йўлларда тўхтатиб қўйган. Бош вазир бу бу ҳолат ҳарбийлар ва полиция томонидан назоратга олинишга ваъда берди.

 

Жаҳон ҳамжамияти Гаити масаласига бефарқ эмас. АҚШ президенти Жозеф Байден Гаитига ёрдам ваъда қилди. БМТнинг инсонпарварлик масалалари бўймча котиби ва фавқулодда вазиятларда ёрдам ташкилоти координатори Мартин Гриффитс  8 миллион ажратилишини билдирди. Бу маблағ биринчи ёрдам маҳсулотларига, жумладан сув, тиббий анжомлар учун срафланади.

 

Маълумот ўрнида, Гаити 2010 йилдаги зилзила асоратларидан ҳалигача қутила олмаган. Зилзила оқибатида 200 минг дан ортиқ инсон ҳалок бўлган эди. Табиий офат етказган зарар 5,6 миллиард еврога тенг деб ҳисобланган. Ўшанда вайрон бўлган бинолар, аҳоли яшаш пунктлари ҳали ҳамон тўлиқ тикланган эмас. 

 

Эслатиб ўтамиз, 7 июль куни Гаити Президенти Жовенель Моиз 53 ёшида ўз уйида ўлдирилганди.

 

Жаҳонгир Қўзиев