СOVID-19'дан тузалгандан кейин вакцина олиш хавфли эмасми?

 

«COVID-19»га қарши вакцинация бўйича энг кўп бериладиган саволларга Санитария-эпидемиологик осойишталик ва жамоат саломатлиги хизмати бўлим бошлиғи Дилором Турсуновадан жавоб берди, деб хабар қилмоқда ССВ матбуот хизмати.

 

— Вакциналар қандай ишлайди?

 

 — Вакциналар тананинг табиий иммунитети билан биргаликда ҳимоя тизимини яратиб, касаллик юқиш хавфини камайтиради. Вакцина инсон танасига юборилгандан кейин иммунитет тизими бунга жавоб бера бошлайди. Яъни иммунитет тизими танага кирган «агент»ни аниқлайди (вирус ёки бактерия) ва шундан сўнг антитаначалар ишлаб чиқара бошлайди.

 

Антитаначалар – бу касаллик билан курашиш учун организмнинг иммунитет тизими томонидан табиий равишда ишлаб чиқариладиган оқсиллардир. У касаллик билан қандай курашиш кераклигини эслаб қолади. Агар инсон келгусида микроб таъсирига қайта учраса ва ўзида касаллик аломатларини ҳис қилса, иммунитет тизими уни тезда йўқ қилишга киришади.

 

Бир сўз билан айтганда, вакцина танада касалликка қарши иммунитетни ишлаб чиқишга кўмак берувчи хавфсиз ва самарали восита саналади.

 

— «COVID-19»га қарши вакцинация ўзи нима учун керак?

 

— Мутахассисларнинг фикрига кўра, аҳолининг 60-70 фоизида коронавирус инфекциясига қарши иммунитетни шакллантирмай туриб, унга қарши самарали курашиб бўлмайди. Шу маънода айтсак, «COVID-19»га қарши эмлаш пандемияни жиловловчи ягона самарали омил ҳисобланади.

 

Тўғри, ниқоб тақиш, ижтимоий масофа сақлаш, антисептик воситалардан фойдаланиш ва жамоат жойларига боришдан ўзини тийиш каби профилактик чора-тадбирлар вирус юқиши ёки уни бошқаларга юқтириш эҳтимолини камайтиришда самарали амал саналади, бироқ бу чоралар пандемияни жиловлаш учун етарли эмас.

 

Вакциналар инсон иммун тизимини мустаҳкамлаб, юқиши мумкин бўлган вирусларга қарши курашишда фаол иштирок этади. Эмлаш орқали нафақат ўзимиз, балки атрофимиздагиларни ҳам касаллик юқишидан ҳимоя қиламиз.

 

—«COVID-19»дан даволанган киши унга қарши эмланиши шартми?

 

— Ҳа. Пандемия хавфи сақланиб қолаётгани ва коронавирус инфекцияси билан қайта касалланиш эҳтимолининг юқорилиги сабабли, ушбу вирус билан аввал касалланган бўлишингиздан қатъи назар, эмланишингиз шарт.

 

Чунки эмлашдан кейинги «орттирилган иммунитет муҳим ҳисобланади. Яъни табиий ва «COVID-19»га қарши эмлаш натижасида ҳосил бўлган орттирилган иммунитет касалликка қарши кучли ҳимояни шакллантиради.