Қинғир ишнинг қийиғи чиқди
Халқимизда қинғир ишнинг қийиғи қирқ йилда ҳам чиқади, деган нақл бор.
Бу бежиз айтилмаган. Ҳар қандай ёвуз ишни халқ нигоҳидан яшириб бўлмайди. Шубҳасиз, қилинган нотўғри ишлар ҳуқуқни муҳофаза қилувчи органлар ҳамда кенг жамоатчилик билан ҳамкорликда ўтказилаётган “Хавфсиз ҳудуд” профилактик тадбирлар доирасида аниқланади. Ўйламай қилинган ҳатти-ҳаракат жавоби, албатта, берилади.
Бухоро вилояти Ромитан тумани Санитария эпидемиология осойишталиги ва жамоат саломатлиги бўлими ходими С.Ш.нинг яширин сири тезкор тадбир давомида ошкор бўлди. У фуқаро K.Р.га “Ғазберон” ва “Қоқиштувон” маҳаллалари ҳудудида нодавлат мактабгача таълим ташкилотини очиши учун “Санитария-гигиена” хулосасини тайёрлаб бериш эвазига 500 минг сўм талаб қилади. Туманнинг Хоса қишлоғида жойлашган НМТТ ҳовлисида кимёвий ишлов берилган ушбу пулларни олаётган вақтида қўлга олинган.
Мазкур ҳолат юзасидан С.Ш. га нисбатан жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, аввалроқ Оққўрғондаги боғча тарбияланувчилари заҳарлангани юзасидан жиноят иши қўзғатилгани ҳамда Самарқаддаги нодавлат мактабгача таълим ташкилотида бир ёшли боланинг калтакланганига ИИВнинг муносабати ҳақида хабар берилганди.
