Юридик университет магистратурасига тест синовлари Ботаника боғида бўлиб ўтади

 

 

Давлат тест маркази хабарига кўра, тест синовлари 2та мутахассислик фани ва чет тилидан (инглиз, немис, француз) ўтказилади. Бунда талабгорларга ҳар бир фандан 25тадан, жами 75та тест топшириғи ва уларни ишлаш учун 2 соат-у 30 дақиқа вақт ажратилади.

 

Чет тили бўйича B2 ва ундан юқори даражадаги миллий ва халқаро сертификатга эга талабгорлар чет тили бўйича имтиҳондан озод қилинади ва уларга шу фан доирасида олиш мумкин бўлган максимал балл берилади. Уларга тест синовида 2та мутахассислик фани учун 1 соат-у 40 дақиқа вақт ажратилади.

 

Тест синовларида тўплаш мумкин бўлган максимал балл – 207,5 балл бўлиб, мутахассислик фанлари бўйича ҳар бир тўғри жавоб учун 3,1 баллдан (жами 155 балл), чет тили фани бўйича эса 2,1 баллдан (жами 52,5 балл) берилади.

 

Талабгорлар тест синовида иштирок этиш учун рухсатномани 18 август куни соат 15:00дан бошлаб Давлат тест марказининг magistr.dtm.uz сайтидан олиши мумкин бўлади.

 

Талабгорлардан тест синови ўтказиладиган ҳудудга шахсини тасдиқловчи ҳужжат ва тест синовида иштирок этиш учун рухсатнома билан соат 18:30дан кечикмаган ҳолда келиш сўралган.