Автоҳалокатга учраган юртдошимиз Ўзбекистонга қайтарилди
Сурхондарёлик 23 ёшли фуқаро бундан 2 йил аввал Россиянинг Ростов-Дон шаҳрига ишлаш учун боради.
Шу йилнинг 29 май куни вақтинчалик меҳнат фаолиятини амалга ошириш вақтида автоҳалокатга учрайди. Оқибатда оғир тан жароҳати олади. Сўнгра ушбу фуқаро Ростов вилоятининг Батайск шаҳри шифохонасига ётқизилади.
У бугун, 19 август куни Соғлиқни сақлаш вазирлиги томонидан ажратилган тиббиёт ходими назорати остида Ростов-Дон — Тошкент йўналишидаги авиарейс орқали Ўзбекистонга олиб келинди.
Тошкент халқаро аэропортида Ташқи меҳнат миграцияси агентлиги, Республика шошилинч тиббий ёрдам илмий маркази маъсул ходимлари ва фуқаронинг яқинлари уни кутиб олди.
Фуқарони тиббий текширувлардан ўтказиш, даволаш муолажаларини давом эттириш мақсадида тез тиббий ёрдам машинасида Республика шошилинч тиббий ёрдам илмий марказига кузатиб қўйилди.
Эслатиб ўтамиз, аввалроқ Россияда оғир аҳволда қолган ўзбекистонлик фуқаро ватанга қайтарилгани ҳамда Швейцарияда вафот этган фуқаронинг жасади Ўзбекистонга олиб келингани ҳақида хабар берилганди.
