Ўзбекистонда «Халқаро ҳожатхона саммити» бўлиб ўтиши кутилмоқда
Туризм ва спорт вазирлиги вакиллари билан Сингапурда жойлашган World Toilet Organization (Бутунжаҳон ҳожатхона ташкилоти) бош котиби ва асосчиси Жек Лим ҳамда Халқаро лойиҳалар бошқарувчиси Сарика Салужа ўртасида онлайн учрашув бўлиб ўтди. Бу ҳақда вазирлик матбуот хизмати хабар берди.
Маълум қилинишича, учрашувда маҳаллий аҳоли ва туристларга қулай санитария-гигиена шароитларини яратиш борасидаги ишларни янада кучайтириш бўйича вазирлик томонидан яна бир ҳукумат қарори лойиҳаси тайёрланаётгани, унинг натижасида мамлакатдаги барча туристлар ташриф буюрадиган объектларнинг 2022 йил якунига қадар тўлиқ замонавий санитария-гигиена шохобчалари билан таъминланиши кутилаётгани айтилган.
Учрашув якунида вазирлик масъуллари томонидан мазкур ташкилот етакчи экспертлари соҳа бўйича тегишли фикрлар алмашиш ҳамда ташкилотнинг 2021 йилдаги халқаро саммитини ўтказиши масаласини муҳокама қилиш мақсадида мамлакатга таклиф қилинган.
Маълумот учун, World Toilet Organization 2001 йилнинг 17 ноябрида Сингапурда ташкил этилган бўлиб, дунё бўйлаб тозалик ва санитария нормаларини ишлаб чиқиш, ҳожатхоналар учун талаблар, янги технологиялар татбиқ этиш, уларнинг жамият саломатлиги ва атроф-муҳитга таъсирини ўрганиш каби йўналишларда фаолият олиб боради. Кўплаб мамлакатларда миллий лойиҳаларни шакллантириш, жамиятда ҳожатхона мавзусига бўлган эътиборсизликка қарши курашиш ва миллий дастурларни хорижда тарғиб қилиш ушбу нуфузли ташкилотнинг асосий вазифаларидан ҳисобланади.
Эслатиб ўтамиз, 2019 йилда Ўзбекистондаги салкам 1300 та мактабда ҳожатхона, қарийб 3 мингтасида ошхона йўқлиги маълум қилинганди.
