Отабек Маҳкамов саломатлиги ҳақида тарқалган миш-мишларга ойдинлик киритди
Таниқли журналист 1 ойдан бери оғир бетоблигини тасдиқлади.
Ижтимоий тармоқларда таниқли журналист, ҳуқуқшунос, актёр Отабек Маҳкамов хасталикка чалингани ва ҳозирда оғир аҳволда экани ҳақида хабарлар тарқалди. Америкада яшаб ижод қилаётган серқирра ижодкор борасидаги хабарга аниқлик киритиш мақсадида Zamon.uz мухбири у билан боғланди.
О.Маҳкамов шифохонада бўлишига қарамай мулоқот қилишдан бош тортмади.
«Афсуски, кеча Нью-Йорк госпиталида иккинчи операциядан кейин кечки пайт операция қилинган жой қонаб кетиб, ўн шкалали оғриқдан, айнан, охирги даражадагиси бошланди. Врачлар оғриқни тўхтатиш учун уч маротаба морфин қилишди, лекин оғриқ умуман тўхтамади», – дейди О.Маҳкамов.
Журналист мамлакатимиздаги тиббиёт соҳасига ҳам бефарқ эмаслигини таъкидлаб ўтди. Давлатимиз раҳбарининг Ўзбекистонда коррупцияни тубдан йўқ қилиш кераклиги ҳақидаги фикрининг бежиз эмаслигини очиқлаб берди.
«Агарда мен Ню-Ёркнинг энг яхши госпиталларидан бирида, зўр мутахассислар бор бўлишига қарамасдан, шунақа умуман чидаб бўлмайдиган оғриқлар билан ётган бўлсам, унда, худди шу касалга чалинган ёки бундан баттарига ватандошларим, кўпчилиги дипломини Тошкент тиббиёт академиясидан сотиб олган врачларнинг қўлида нималар қилишаётган экан», – деб ўйлаб қолдим дейди журналист.
«12 йил олдин ўзбекистонлик чаласавод врачларни деб 49 ёшли ойимдан айрилиб қолган эдим.Шунинг учун бу дунёни ўша оғир вазиятда тарк этишим мумкинлигини билиб, ҳеч бўлмаса ўз позициям ва илтимосимни шошилиб, қалтираган қўлларимда хатолар билан ёздим. Бор гап шу. Бунақа шов-шув кўтарилади деб ўйламаган эдим. Матн хатолари таҳририят томонидан ўзгартирилмаган», – дея таъкидлайди журналист.
Маълумот учун, О. Маҳкамов Соғлиқни сақлаш вазирлиги тизимига кирувчи бирорта ҳам даволаш муассасасида муолажа олмагани аниқланди. Бу ҳақда Ўзбекистон Республикаси Соғлиқни сақлаш вазирлиги матбуот хизмати хабар берди.
Отабек Маҳкамов қандай касаллик билан оғригани ҳақида маълумот бериш ортиқча эканини айтди. Ҳозирги аҳволи ҳам анча оғирлигини таъкидлаб шифокорини алмаштираётганини маълум қилди.
