Беларусда исириқ гиёҳванд моддалар қаторига киритилди
Беларусда гармалин ва гармин (исириқ) хавфли психотроп моддалар қаторига киритилди. Бу ҳақда Беларуснинг Ўзбекистондаги элчихонаси матбуот хизмати мамлакат божхона органлари маълумотларига асосланиб хабар берди.
Таркибида юқоридаги моддалар бор ўсимликлар Беларусда давлат назоратига олинадиган гиёҳвандлик воситалари, психотроп моддалар ҳамда прекурсорларнинг республика рўйхатига киритилган ва тиббий мақсадларда ишлатилмайди.
Қайд этилишича, ушбу моддалар ва уларни ўз ичига олган ўсимликларни Беларусь ҳудудига олиб кириш мамлакат Жиноят кодексининг 328-моддасига мувофиқ жиноий жавобгарликка тортишга ёки 12 йилгача қамалишга сабаб бўлади.
«Беларусь қонунчилиги бузилмаслиги учун республика божхона органлари мамлакатга кираётган фуқаролардан ўзлари билан ўта хавфли психотроп модда бўлган ўсимликларни олиб келмасликни сўрамоқда», дейилади хабарда.
Шунингдек, элчихона хабарида Беларусда тамаки (тозаланган тамаки кукуни) ҳамда ишқорий компонентлардан (бўр, оҳак ёки бошқа ишқорий моддалар) сўриш ва чайнаш учун мўлжалланган (снус, носвой ва бошқалар) тутунсиз тамаки маҳсулотларини ишлаб чиқариш ва муомалага киритиш тақиқлангани эслатиб ўтилган.
