Кобулдан Бухорога эвакуация қилинган 200 нафарга яқин афғонистонлик Венгрияга олиб кетилди
Бу ҳақда Бухоро халқаро аэропорти масъуллари берган маълумотга таяниб «Дарё» мухбири хабар берди.
Маълум қилинишича, 2021 йилнинг 20—22 август кунлари Кобул аэропортидан Венгрия ҳаво кучлари орқали Бухоро халқаро аэропортига 200 нафарга яқин афғон фуқароси — 56 нафар эркак, 53 нафар аёл, 64 нафар бола эвакуация қилинган. Ва аэропорт ҳудудида вақтинчалик чодирлар ўрнатилиб, зарур озиқ-овқат маҳсулотлари ҳамда дорилар билан таъминланган. Шунингдек, коронавирусга қарши тестлар олинган.
Аниқлик киритилишича, эвакуация қилинганлар орасида 2 нафар венгриялик, 2 нафар австриялик, 35 нафар америкалик ҳамда 134 нафар эронлик бўлган.
Кобулдан Бухорога эвакуация қилинганларнинг аксарият қисми 23 август, душанба куни Венгриянинг Будапешт шаҳрига олиб кетилган.
«Афғон болалари узоқ йилларки, тонгни бомбалар портлашию, қуроллар отишмаси билан қаршилайди. Болалигимиздан Ўзбекистон давлати фуқаролари тонгни байрам шодиёналари билан қаршилаб, кунни байрам мушаклари отилиши билан якунлашади, дея эшитганмиз. Бу худди бизга эртаклардагидек туюларди. Бугун эса шу эртакнамо заминдамиз. Ўзбекистон бизни худди ўз фарзандидек қаршилади, дўст билди, биродар кўрди. Чексиз миннатдормиз», — дейди афғонистонлик Абу Наср Акбар.
