Зеленский Байден билан учрашувгача толиқиб қолган(ми)?
31 август 2 сентябрь кунлари АҚШ Президенти Жозеф Байденнинг таклифига кўра Украина Президенти Владимир Зеленский расмий ташриф билан Қўшма штатларда бўлди.
Байден билан учрашув пайтида Зеленскийнинг ўзини тутиши ижтимоий тармоқларда кенг муҳокамаларга сабаб бўлди. Украина етакчиси мулоқот чоғида ўзини бошқача тутгани акс этган видео ижтимоий тармоқларда пайдо бўлди. Хусусан, видео Россия ТИВ расмий вакили Мария Захарованинг телеграм-каналида эълон қилинган.
Маълумот ўрнида, 31 август куни Украина президентининг АҚШга расмий ташрифи бошланди. Шу куни президент АҚШ мудофа ва энергетика вазирлигида учрашувлар ўтказди. Жумладан, Мудофаа вазирлигида Украина ва АҚШ ўртасида “Мудофаа ҳамкорилиги стратегик асослари тўғрисида” шартнома имзоланди. Экспертлар бу келушув орқали Киев ва Вашингтон ўртасида ҳарбий алоқалар янги босқичга кўтарилганини таъкидлашмоқда.
1 сентябрь куни Зеленский АҚШ президенти Жозеф Байден билан учрашди. Аслида бу 31 август куни бўлиши керак эди, аммо АҚШнинг Афғонистондаги эвакуацияни якунлаши ҳам шу кунга тўғри келгани учун учрашув 1 сентябрга қолдирилган.
Зеленскийнинг фикрича, Украинанинг иқтисодий трансформация ва тикланишида АҚШ муҳим рол ўйнайди. Байден ҳам икки томонлама муносабатлар стратегик характерга эга эканлигини қайд этди.
Учрашувдаги марказий мавзулардан бири Россия билан муносабатлар бўлди. АҚШ президенти “Биз Россия агрессияси қаршисида Украина ҳудудий яхлитлиги ва суверенитетига тўлиқ содиқ қоламиз. Украинанинг евроатлантик интилишларини ҳам қўллаб-қуватлаймиз”, -деб айтиб ўтган. Шунингдек, Байден Украинага қўшимча 60 миллион долларлик янги ҳарбий ёрдам дастурини маъқуллаганлигини таъкидлади.
Учрашув давомида Россиянинг Қримни қўшиб олиши ва Донбассдаги қуролли низо 14 мингдан ортиқ инсоннинг ҳаётига зомин бўлганлиги маълум қилинди. Зеленский Байдендан 450 дан ортиқ украиналик асирларни озод қилинишида ёрдам сўраган.
Шунингдек, энергетика масаллари ҳам муҳокама қилинди. Икки давлат ҳам Россиянинг “Шимолий оқим-2” газ қувури қурилишига қарши эканини маълум қилди. Украина ва АҚШ бу лойиҳада Европанинг энергетик мустақиллигига таҳдидни кўрмоқда.
Украина Ташқи ишлар вазири Дмитрий Кулеба Зеленский ташрифини “ўта муваффаққиятли”, - деб баҳолади.
Жаҳонгир Қўзиев
