Бутун Испания мотамда: мамлакатда уч кунлик мотам эълон қилди

Испания Бош вазири Педро Санчес Толедо провинциясида икки поезд тўқнашуви оқибатида камида 68 киши ҳалок бўлгани муносабати билан мамлакатда уч кунлик миллий мотам эълон қилди. Бу ҳақда El Plural хабар берди.

“Бутун Испания мотамда”, — деди ҳукумат раҳбари.

Испания транспорт вазири Оскар Пуэнте дастлабки маълумотларга кўра, ҳодисага темир йўл сигнализация тизимидаги носозлик сабаб бўлганини билдирган. Унинг айтишича, тизим поездларга тўхташ сигналини берган, бироқ қисқа вақт ўтиб, поездлардан бири ҳаракатни давом эттириш сигналини олган.

Ҳалокат 28 октябрь куни соат 08:54 атрофида Толедо провинциясидаги Урда шаҳри яқинида содир бўлган. Давлатга қарашли Ренфе компаниясининг АVE поезди ва Ирё хусусий ташувчисининг поезди юқори тезликдаги темир йўл линиясида тўқнашган.

Дастлабки маълумотларга кўра, Ирё поезди рельсларда тўхтаб қолган, унинг ортидан келаётган Ренфе поезди эса унга урилган. Тўқнашув оқибатида бир нечта вагон рельсдан чиқиб кетган.

Испаниянинг CSIF касаба уюшмаси транспорт вазири Оскар Пуэнтени истеъфога чиқишга чақирди. Уюшма вазирни масъулиятни ўз зиммасига олиш ўрнига, темир йўл ходимини айбдор қилиб кўрсатишга уринаётганликда танқид қилди.

Оскар Пуэнте ҳозирча истеъфога чиқиш нияти йўқлигини билдирган. Унинг айтишича, биринчи навбатда ҳалокат сабабларини аниқлаш ва воқеани тўлиқ текшириш керак.

Бош вазир Педро Санчес агар бепарволик ёки қоидабузарлик аниқланса, қатъий чоралар кўрилишини ваъда қилган.

Ҳодиса сабаблари ўрганилмоқда. Дастлабки тахминлар орасида сигнализация тизимидаги носозлик ва инсон омили бор. Мадрид ва Андалусия ўртасидаги тезюрар поездлар қатнови тўхтатилган.