Шимолий Корея 10 га яқин баллистик ракета учирди: Жанубий Корея ҳарбийлари баёнот берди
Бу Пхеняннинг октябрь ойидаги учинчи ракета учириши бўлди.
Шимолий Корея 29 октябрь куни Япон денгизи томон 10 га яқин қисқа масофали баллистик ракета учирди. Бу ҳақда Жанубий Корея Қуролли кучлари штаб бошлиқлари қўмитасига таяниб, Yonhap ахборот агентлиги хабар берди.
Маълумотларга кўра, ракеталар Шимолий Кореянинг жануби-шарқидаги Вонсан порт шаҳри ҳудудидан учирилган. Жанубий Корея ва АҚШ ҳарбийлари ракеталарнинг учиш масофаси ҳамда бошқа техник хусусиятларини таҳлил қилмоқда.
Жанубий Корея ҳарбийлари учиришни Пхенян томонидан куч намойиши бўлиши мумкин, деб баҳоламоқда.
Бу Шимолий Кореянинг октябрь ойида баллистик ракеталарни учириш бўйича учинчи ҳолати ҳисобланади. Аввалги учиришлар 3 ва 12 октябрь кунлари амалга оширилган.
Аввалги синовлардан бирида Жанубий Корея ва Япония ракетага қарши мудофаа тизимлари ракетанинг ўзгарувчан траэкториясини кузатишда қийинчиликка дуч келгани хабар қилинган. Ракетани аниқлашдаги муаммолар ва унинг учиш масофасига оид турли баҳолар Шимолий Кореянинг ракетага қарши мудофаа тизимларини четлаб ўтиш имкониятлари юзасидан саволларни келтириб чиқарган.
Ракета синовлари ортидан Пхенян АҚШ ва Жанубий Кореяга нисбатан кескин баёнотларини ҳам давом эттирмоқда. Шимолий Корея Мудофаа вазирлиги сентябрь ойида Вашингтон ва Сеул ҳаракатларига жавобан мамлакатнинг ядровий қуролли кучлар сиёсатига оид қонун қоидаларини қўллашга рухсат берилганини билдирган эди.
