АҚШда ўзбекистонлик фуқаро қўлга олинди: у “энг хавфли жиноятчилар” қаторига киритилди
Маълумотларга кўра, у аввал ҳам ҳужум ва талончилик билан боғлиқ айбловлар бўйича судланган.
Оқ уй АҚШнинг Огайо штати, Чилликот шаҳрида 7 октябрь куни Иммиграция ва божхона назорати (ICE) ходимлари томонидан қўлга олинган Ўзбекистон фуқароси Сардор Тиркашев ҳақида маълумот берди.
Оқ уйнинг ижтимоий тармоқдаги саҳифасида Тиркашев бошқа ҳибсга олинган ҳужжатсиз муҳожирлар билан бирга «Қўшма Штатлардаги энг хавфли жиноятчилар» қаторида тилга олинган.
Расмий маълумотга кўра, Тиркашев аввал оғирлаштирувчи ҳолатлардаги икки ҳужум ва талончилик билан боғлиқ айбловлар бўйича судланган.
28 октябрь куни АҚШ Ички хавфсизлик департаменти (DHS) Огайо штатида жиноий тарихга эга, мамлакатда ҳужжатсиз яшаётган муҳожирларнинг ҳибсга олингани ҳақида хабар берди. Агентлик улар орасида жинсий тажовуз, бўғиб ўлдириш, маст ҳолда автомобил бошқариш ва кокаин савдоси билан боғлиқ жиноятлар учун жавобгарликка тортилган шахслар борлигини маълум қилди.
DHS директори Маркуэйн Муллиннинг таъкидлашича, идора жиноий тарихга эга ҳужжатсиз муҳожирларни ҳибсга олиш ва депортация қилиш ишларини давом эттиради.
Шу билан бирга, Slavic Sacramento нашри Сардор Тиркашевнинг ҳибсга олингани ҳақида ҳуқуқни муҳофаза қилиш органларидан маълумот топганини, бироқ ICEдан бу ҳолат юзасидан бевосита тасдиқ ололмаганини ёзган.
