Мисрда турар-жой биноси қулаши оқибатида 4 киши ҳалок бўлди
Миср пойтахти Қоҳирада турар-жой биноси қулаши оқибатида 4 киши ҳалок бўлди. Уйнинг қолган аҳолиси эвакуация қилинган, деб хабар беради “Al Yomus As Sabi “ портали.
Тўрт қаватли бинонинг қулаши Шубра ал-Кхайм ҳудудида содир бўлган.
Бино деворларида ёриқлар пайдо бўлгач, аҳоли уйни тарк эта бошлади.
Юқори қаватда юридик фирма жойлашган эди. Қулаш вақтида у ерда компания эгаси ва унинг ҳамкасблари бўлган. Номаълум сабабларга кўра улар бинони тарк этмаган. Натижада икки киши воқеа жойида ҳалок бўлди.
Қолган икки киши эса вайроналар остидан олиб чиқилган, бироқ тан жароҳати туфайли касалхонага олиб кетилаётганда вафот этди.
Уй нима сабабдан қулаб тушгани ҳозирча номаълум.
Эслатиб ўтамиз, 2021 йил март ойида Қоҳира туманларидан бирида кўп қаватли уй қулаб тушганди. Бунинг оқибатида 25 киши ҳалок бўлди. Кейинчалик маълум бўлишича, уй эгаси бир неча қаватга ноқонуний равишда бино қурган ва фожиа содир бўлишидан олдин биноларнинг бирида таъмирлаш ишлари бошланган, деворлари ёрилиб, таянчи бузилган.
Аввалроқ президенти ўлдирилган мамлакатда зилзила оқибатида бир ярим минг бино қулагани тўғрисида хабар берилганди.
Насиба Тўхтаева
