Пентагон Россияни АҚШ ва Европа учун асосий таҳдид сифатида баҳолади
Пентагон Россияни АҚШ ва Европа учун асосий таҳдид сифатида баҳолади, дея хабар бермоқда “ТАСС”.
АҚШ мудофаа вазирининг сиёсий масалалар бўйича ўринбосари Колин Кол Россия яқин вақт ичида Вашингтон учун катта муаммога айланиши мумкинлигини айтган. “Россия яқин йилларда хавфсизлик нуқтаи назаридан АҚШ ва Европа учун асосий таҳдид бўлиб қолади. Москва тобора ҳужумкор рақибга айланиб бормоқда. У ўзининг таъсир доирасини кенгайтириш баробарида Ғарб давлатлари ўртасида низо қўзғаш орқали қўпорувчилик вазифасини бажармоқда”, — деган Кол.
Пентагон вакилининг фикрича, Россиянинг Европа, Осиё ва Яқин Шарқ, шунингдек, кибермакондаги ҳаракатлари АҚШ ва унинг иттифоқчилари учун асосий таҳдид ҳисобланади. “Москва шаффофликдан тез-тез йироқлашиб, ўз мақсадларига эришиш учун ҳарбий кучлардан фойдаланишдан ҳам тоймайди. Шу боис АҚШ Россиянинг НАТО шарқий чегаралари ва Қора денгиздаги фаолиятини доимий кузатиб боради”, — деб қўшимча қилган Кол.
Бундан аввал АҚШ генерали Жон Хайтен Россия ва Хитой билан урушга йўл қўйиб бўлмаслигини маълум қилган. Шунингдек, АҚШ давлат котиби собиқ ёрдамчиси Аарон Митчел Вашингтоннинг глобал урушдаги имкониятларини паст баҳолаган эди.
Жаҳонгир Қўзиев
