"Кино—5 кунда" танлови ғолибларига совринларни машҳур кинорежиссёр Люк Бессон топширади
Мамлакатимизда қайта тикланаётган Тошкент халқаро кинофестивали доирасидаги “Кино —5 кунда” лойиҳаси ёш киноижодкорлар танлови бўлиб, унда иштирокчилар диплом, статуэтка ва пул мукофотлари билан тақдирланади.
“Кино —5 кунда” танловининг асосий мақсади миллий кинони қўллаб-қувватлаш, рағбатлантириш ва ривожлантиришга қаратилган. Танлов шартларига мувофиқ, иштирокчилар беш кун ичида ўзбек урф-одатлари, маданияти ва тарихига оид фильмларни суратга олиши керак бўлади.
Ҳар бир ёш киноижодкор учун бу мукофотни, айниқса, франсиялик машҳур кинорежиссёр, сценарийнавис, продюсер ва ёзувчи Люк Бессоннинг қўлидан қабул қилиб олиши ҳам катта бахт, ҳам юксак шараф саналиши шубҳасиз.
Маълумот учун: Люк Бессон “Никита”, “Такси” филъмининг барча қисмлари, “Юк ташувчи”, “Валериан ва минглаб сайёралар шаҳри” каби ўлмас асарлари билан машҳур.
Эслатиб ўтамиз, бундан аввал Тошкент халқаро кинофестивали ғолибларига топшириладиган номинациялар очиқлангани ҳамда Тошкент халқаро кинофестивалида машҳур режиссёр иштирок этиши кутилаётгани ҳақида хабар берилган эди.
Чўлпоной Аҳмедова
