Жасур Яхшибоев бугунги Чемпионлар лигасида ўйнайди...ми?
Бугун Европа чемпионлар лигасининг навбатдаги ўйинларига старт берилади.
Мусобақанинг 3-тури доирасидаги “Интер” – “Шериф” учрашувидан олдин Молдова клуби бош мураббийи ёрдамчиси Дмитрий Қора-Мустафо Италиядаги ўйинда ўзбекистонлик Жасур Яхшибоев жамоага ёрдам бера олмаслигини маълум қилди: “Афсуски, Интерга қарши ўйинимиз олдидан таркибимизда йўқотиш бор. Жасур Яхшибоевнинг жароҳати сабабли таркибда йўқлиги алам қилмай қолмайди. Тилл ва Аддо эса ўйинга тайёргарлик кўрмоқда. Уларнинг қай даражада тайёрлигини эса ўйин кўрсатади”.
Эслатиб ўтамиз, Жасур Яхшибоев Европа чемпионлар лигасининг 2-турида “Реал Мадрид” дарвозасини ишғол этиб, “Шериф”нинг Мадриддан муҳим ғалаба билан қайтишига ҳисса қўшганди. Жамоа ҳозирда 6 очко билан гуруҳда пешқадамлик қилмоқда.
Маълумот учун: Италияда ўтадиган “Интер” – “Шериф” учрашуви бугун соат 23:59 да бошланади.
Аввалроқ Европа чемпионлар лигасида гол урган илк ўзбек йигити ва Жасур Яхшибоев “Шериф”га ўтгани ҳақида хабар берилганди.
Жамшидбек Амиров
