Энди ерости ва ерусти метро бекатларида савдо ва хизмат кўрсатиш майдончалари ташкил этилади
Маълум қилинишича, Ўзбекистон Республикаси Президентининг “Тошкент метрополитени фаолиятини самарадорлигини ошириш чора-тадбирлари тўғрисида”ги қарори қабул қилинди.
Қарорга асосан, “Тошкент метрополитени” фаолиятини тубдан ўзгартириш белгиланган. Жумладан, метрополитеннинг бошқарув тузилмасини такомиллаштириш, метрополитен тармоғини ривожлантириш, йўловчилар оқимини кўпайтириш, замонавий технологияларни жорий этиш ҳисобига метрополитеннинг молиявий-иқтисодий самарадорлигини ва рентабеллигини ошириш режалаштирилган. Бу ҳақда АОКАда “Тошкент метрополитени” ДУК мутасаддилари иштирокида ўтказилган брифингда маълум қилинди.
Қайд этилишича, жорий йилнинг охиригача Тошкент метрополитени учун 5 та, 2022 йилда 14 та тўрт вагонли метро поездлари харид қилинади ва поездларнинг сони 80 тага етказилади. Натижада, метро поездларининг ўртача ёши 38 ёшдан 26 ёшга қисқаради.
Шунингдек, 2021 йил 1 сентябрдан Чилонзор йўналиши 3 минут ва Ўзбекистон йўналиши бўйича биринчи марта 4 минутда ишлаш ташкил қилиниши эвазига йўловчиларни манзилга етказиш вақти 30 фоизга қисқартирилди. Бундан ташқари, замонавий реклама воситалари (электрон дисплей) ўрнатилиши ҳисобига рекламалар сони 3-4 баробарга оширилади. Ер ости ва ер усти метро бекатларида савдо ва хизмат кўрсатиш майдончалари ташкил этилади ва тадбиркорларга электрон аукцион шартларида ижарага берилади.
Маълумот учун эндиликда ер ости ва ер усти метро бекатларида савдо ва хизмат кўрсатиш майдончалари ташкил этилади.
Қарор ижросини таъминлаш бўйича метрополитен бошқармасида 3 та йўналишда Ишчи гуруҳлар ташкил этилиши кўзда тутилган.
Эслатиб ўтамиз, аввалроқ Россиядан Ўзбекистонга 20 та замонавий метро вагонлари юборилиши ва Тошкентга янги метро вагонларининг навбатдаги партияси келиши ҳақида хабар берилганди.
Шунингдек, 2022 йил 1 апрелгача ерости метроси ичида ҳам телефонда гаплашиш имкони пайдо бўлиши ҳамда Россиядан келтирилган поездларда эшиклар кенгайтирилиб, видеокузатув кучайтирилгани ҳақида хабар қилинганди.
Чўлпоной Аҳмедова
