Шарқ мамлакатларида ташкил этилган сайлов участкалари иш бошлади
Ўзбекистон Республикасининг 37 та хорижий давлатлардаги ваколатхоналари ҳузурида тузилган 54 та сайлов участкалари, хусусан, Шарқ мамлакатларида ташкил этилган сайлов участкалари иш бошлади.
Овоз бериш биринчи бўлиб Ўзбекистон Республикасининг Япония, Жанубий Корея, Хитой, Малайзия, Сингапур, Индонезия, Таиланд, Ҳиндистон ва Россиянинг Узоқ Шарқдаги ваколатхоналари ҳузурида ташкил этилган сайлов участкаларида бошланди.
Хусусан, Ўзбекистоннинг Индонезиядаги элчихонасида ташкил этилган 13-сайлов участкасида маҳаллий вақт билан 8.00да овоз бериш жараёнлари бошланди. Овоз бериш жараёни Ўзбекистон Конституцияси, Сайлов кодекси талаблари ҳамда карантин қоидаларига мувофиқ амалга оширилмоқда.
Маълумот учун: хорижда яшаётган фуқаролар ариза асосида, хориждаги сайлов участкасидаги (дипломатик ёки бошқа ваколатхонадаги) сайловчилар рўйхатига киритилган. Аризалар ёзма ва электрон тартибда сайловга 15 кун қолгунга қадар қабул қилинган. Хориждаги ватандошларимизнинг сайловга оид саволларига жавоб бериш мақсадида Марказий сайлов комиссиясининг 998 (55) 500-12-00 рақамли ишонч-телефони ишлаб турибди.
Эслатиб ўтамиз, кузатувчилардан бири афғонистонлик Нури Ҳусайн Али, Тожикистонлик кузатувчи ҳамда Покистон мамлакати кузатувчиси Tezeen Akhtar Ўзбекистон Президенти сайлови борасидаги фикрлари билан бўлишганди.
Бундан аввал сайловчиларнинг умумий сони 21,2 миллион нафардан ошгани, бугун бўлиб ўтадиган Ўзбекистон Республикаси Президенти сайловида сайловчилар учун эслатма, Президент сайловини ўтказиш бўйича 10 мингдан ортиқ сайлов участкаси тузилгани ҳақида хабар берилганди.
