Сайловчиларнинг умумий сони 21,2 миллион нафардан ошди
Бугун Тошкент вақти билан соат 8:00 да мамлакатимиздаги 10 минг 760 сайлов участкасида Ўзбекистон Президенти сайловида овоз бериш бошланди.
Юртимизнинг барча ҳудудларида, шунингдек, хорижда бўлиб турган юртдошларимиз давлатимиз келажаги учун муҳим танловни амалга оширмоқда. Бу эса Ўзбекистоннинг истиқболдаги тараққиёт векторини белгилаб беради.
Қайд этилишича, Ўзбекистоннинг Токиодаги дипломатия ваколатхонаси ҳузурида ташкил этилган сайлов участкаси Президент сайловида энг биринчи бўлиб очилган бўлса, Америка Қўшма Штатларида бўлиб турган ўзбекистонликлар овоз бериш жараёнига якун ясайди.
Жорий сайловда сайловчиларнинг умумий сони 21,2 миллион нафардан ошди.
Маълумот учун: хорижий давлатларда тузилган 54 та сайлов участкасидаги сайловчилар рўйхатига жами 299 минг 780 нафар сайловчи киритилган. Сайлов куни ўз яшаш жойида бўлиш имкониятига эга бўлмаган сайловчилар учун 14—20 октябрь кунлари муддатидан олдин овоз бериш ўтказилган бўлиб, унда хорижий давлатлардаги 120 минг 524 нафар сайловчи-ватандош иштирок этган.
МСК маълумотига кўра, унда 120,5 минг Ўзбекистон фуқароси иштирок этган.
Эслатиб ўтамиз, кузатувчилардан бири афғонистонлик Нури Ҳусайн Али, Тожикистонлик кузатувчи ҳамда Покистон мамлакати кузатувчиси Tezeen Akhtar Ўзбекистон Президенти сайлови борасидаги фикрлари билан бўлишганди.
Бундан аввал бугун бўлиб ўтадиган Ўзбекистон Республикаси Президенти сайловида сайловчилар учун эслатма, Президент сайловини ўтказиш бўйича 10 мингдан ортиқ сайлов участкаси тузилгани, Ислом ҳамкорлик ташкилоти кузатувчилар миссияси Ўзбекистонга келгани, сайлов бюллетенининг шакли ва матни тасдиқлангани ҳамда Туркманистонда Ўзбекистон Президенти сайловига бағишланган брифинг ташкил этилгани ҳақида хабар берилганди.
