Yanush Pexochinsskiy, Польша давлати кузатувчиси:
Ўзбекистон мустақиллигининг 30 йиллиги муносабати билан кўкрак нишони билан тақдирландим.
—Мен 3 йил давомида Ўзбекистон ва Польша ўртасидаги халқаро иқтисодиётни ривожлантириш комиссиясини бошқарганман. Ўзбекистонга турли тадбирлар сабабли кўп келганман. Бизни қувонтирадиган жиҳат шундан иборатки, Польша ва Ўзбекистон ўртасидаги ҳамкорлик ва алоқалар тобора ривожланиб бормоқда
Шу боис Ўзбекистонда бўлаётган сайлов жараёнларига бефарқ эмасмиз. Польшадаги ўзбекистонликларнинг деярли ҳаммаси ўз овозини берди.
Мен Самарқанддан бугун эрталаб келдим. Самарқандда 12 та сайлов участкасида бўлдим. Хорижий кузатувчилар сайлов жараёнини кузатишлари учун барча имконият яратиб берилди. Ўзбекистон сайлов тизими ва президентликка номзодлар дастурлари билан батафсил танишиб чиқдим. Ўзбекистондаги сайлов тизими ўзида сайловчилар ҳуқуқ ва манфаатларини тўлиқ акс эттирган.
Ўтган давр мобайнида мамлакатда сайлов тизими соҳасида амалга оширилган янгиланишлар сайловларни тенглик, шаффофлик муҳитида, халқаро ҳуқуқнинг асосий меъёр ва тамойилларига тўла мос ҳолда ўтказилишига мустаҳкам замин яратди. Мана, ҳозиргина Марказий сайлов комиссияси сайловнинг дастлабки натижаларини эълон қилди. Унга кўра, Шавкат Мирзиёев Ўзбекистон Республикаси Президенти этиб сайланди. Фурсатдан фойдаланиб бу муваффақият билан Президент ва Ўзбекистон халқини табриклайман.
Дарвоқе, Ўзбекистонга келишимдан 2 ҳафта олдин мамлакатингизнинг Польшадаги элчиси чақириб, ўзаро ҳамкорликда самарали иш олиб борганим учун мени Ўзбекистон мустақиллигининг 30 йиллиги муносабати билан кўкрак нишони билан тақдирлади. Бу мен учун катта фахр.
Эслатиб ўтамиз, Zamon.uz мухбири Покистондан келган халқаро кузатувчи фикрлари билан ўртоқлашганди.
Аввалроқ Россия Федерацияси кузатувчиси Генадий Бессонов ҳамда “Человек и закон” ҳуқуқий газетаси бош муҳаррири Марат Башимов сайлов ҳақидаги фикрлари билан бўлишгани ҳақида хабар берилганди.
Муножат Валиева
