Почта “посилка”ларини ташишда энди роботлардан фойдаланилади
Россия почтаси Москвада ҳайдовчисиз роботлар ёрдамида “посилка” (жўнатма) ларни етказиб беришни йўлга қўйишни мақсад қилган.
Келгуси ойда Россия почтаси Яндекс роботлари ёрдамида жўнатмаларни Москванинг 27 та филиалидан етказиб беришни бошлайди. Бу ҳақда РБC компанияси хабар берди.
Хизматдан фойдаланмоқчи бўлган россияликлар роботнинг харитадаги ўрнини кузатиши мумкин бўлади. Смарт “почтачи” жўнатмани уйнинг кириш қисмига етказганда, фойдаланувчининг мобил телефонига хабар келади. Шундан сўнг мазкур шахсга тасдиқлаш коди ҳам юборилади. Код иловага киритилиши лозим бўлади. Фойдаланувчи аниқ бўлгач роботнинг юк қопқоғи очилади ва шундан кейин жўнатмани олиш мумкин.
Етказиб бериш хизмати икки километр масофагача амал қилади. Хизматдан андроиддаги почта иловаси орқали фойдаланиш мумкин. Компаниянинг таъкидлашича, хизмат нархи амалиёт бошланишида бир рубл бўлади.
Бундан аввал Хитойда учар автомобиль тақдим этилгани, кўчаларни тозаловчи робот синовдан ўтказилгани ҳамда ZTE “ақлли” футболка чиқаргани ҳақида хабар берилганди.
Оламгир Абдиев
