Ўзбекистонда тотализатор ва букмекерлик фаолиятини реклама қилаётган 10 дан ортиқ сайтга кириш чекланди
Ўтказилган 385 та ўрганишда 168 та ҳолатда бундай хизматлар рекламаси аниқланган ва уларнинг барчаси бартараф этилган.
Реклама муносабатлари Ўзбекистон Республикасининг “Реклама тўғрисида”ги Қонун ва бошқа 10 га яқин қонунчилик ҳужжатлари билан тартибга солинади.
Тадбиркорлик ва истеъмолчилик маданиятини такомиллаштириш, реклама соҳасида ноҳалол рақобатга ва нотўғри рекламанинг олдини олиш мақсадида Агентлик томонидан жорий йилнинг ўтган даври мобайнида 19 мингдан зиёд ўрганишлар ўтказилган. Шундан 10 минг ҳолатда турли камчиликлар аниқланган ва уларни тезкор бартараф этиш чоралари кўрилди. Бу ҳақда АОКАда Истеъмолчилар ҳуқуқларини ҳимоя қилиш агентлиги матбуот котиби Моҳрухсор Тоғаева иштирокида ўтказилган брифингда айтиб ўтилди.
Агентлик томонидан дори воситалари, биологик фаол қўшимчалар ва бошқа даволаш препаратлари, рағбатлантирувчи тадбирлар, нодавлат таълим ва хорижда ўқиш хизматларини кўрсатиш, даволаш, тиббий хизмат ва диагностика хизматларини кўрсатиш билан боғлиқ рекламалар бўйича ўрганишлар олиб борилди.
Қайд этилиишича, реклама қилиниши қонун билан тақиқланган ёки чекланган маҳсулотлар, жумладан, тамаки, электрон сигареталар, энергетик ичимликлар, алкогол, пиво, қимор ва таваккалчиликка асосланган бошқа ўйинлар рекламаси бўйича аниқланган ҳолатлар бартараф этилиши таъминланди.
Маълумот учун: бугунги кунда республикамизда тотализатор ва букмекерлик фаолиятини амалга ошириш ва, албатта, бундай хизматларни реклама қилиш ноқонуний ҳисобланади. Ўтказилган 385 та ўрганишда 168 та ҳолатда бундай хизматлар рекламаси аниқланган ва уларнинг барчаси бартараф этилган.
Таъкидланишича, АОКА билан ҳамкорликда 10 дан ортиқ тотализатор ва букмекерлик рекламасини ноқонуний равишда юритувчи сайтларга кириш чеклаб қўйилди. Айрим шахслар томонидан ўзбошимчалик билан ўз рекламаларини дарахтларга осиб қўйиш ҳолатлари бўйича аниқланган 2700 дан ортиқ рекламалар ҳам олиб ташланди.
Бундан ташқари, моддий маданий мероснинг 1 минг 50 та кўчмас мулк объектларида ўтказилган ўрганишларда 131 та ҳолатда жойлаштирилган турли рекламалар ҳам тартибга келтирилди. Ўтказилган ўрганишларда аниқланган камчиликлар юзасидан 76 та иш қўзғатилди ва тегишли кўрсатмалар берилди.
Шу билан бирга, нотўғри реклама оқибатида сотиб олинган товар (иш, хизмат) туфайли истеъмолчига 104 миллион сўм миқдорда етказилган зиён тўлиқ ҳажмда қопланиб берилди.
Эслатиб ўтамиз, сўнгги йилларда оммалашиб бораётган ахборот алмашиш ва тарқатиш манбаи ҳисобланган ижтимоий тармоқларда жойлаштирилган рекламаларнинг 2 750 тасида қонунбузилиш ҳолатлари аниқланган ва бартараф этилмоқда.
Аввалроқ Ўзбекистонда 10 дан ортиқ букмекерлик веб-сайтлари блоклангани, тотализаторларнинг ноқонуний рекламаси кўпайиб бораётгани ҳамда юртимизда букмекерлик ва тотализатор фаолияти ҳали ҳам қонуний эмаслиги ҳақида хабар берилганди.
