Ўзбекистонлик мигрантларга 40 минг рубллик иш таклиф этилмоқда
Ташқи меҳнат миграцияси агентлиги Россияда ишлаш истагида бўлган фуқароларга огоҳлантириш билан чиқди.
Қайд этилишича, Россиянинг бир қатор иш берувчилари томонидан Москва, Санкт-Петербург шаҳарлари, Амур, Новосибирск, Калуга, Тула, Мурманск, Калининград, Москва областлари ҳамда Краснодар ўлкасида Ўзбекистон фуқаролари учун қурилиш соҳасида 10 мингта бўш иш ўрни таклиф қилинмоқда.
Фуқаролар номига Россияда ишлаш ҳуқуқини берувчи патент Ўзбекистонда расмийлаштирилади. Номзодлар учун хорижга чиқиш паспортини тезлаштирилган тартибда тайёрлаб бериш таъминланиши айтилган.
Таъкидланишича, ойлик маош иш ҳажмига қараб 40 минг рублдан бошланади. Фуқароларга қурилиш соҳасининг 60 дан ортиқ йўналишлари бўйича ишлар таклиф этилади.
Маълумот учун: ушбу бўш иш ўринлари тўғрисидаги батафсил маълумотларни Ташқи меҳнат миграцияси агентлигининг ҳудудлардаги филиалларидан олиш мумкин.
Эслатиб ўтамиз, бундан аввал ТИВ Озарбайжонга бормоқчи бўлган фуқароларни огоҳлантирганди. Шунингдек, Россиядаги мигрантлар энди “Золотая Корона” орқали 15 минг рублгача қарз олиб, ватанига жўнатиши мумкинлиги, Москвада ўзбекистонлик мигрантнинг жасади топилгани ҳамда ўн минг Ўзбекистонлик яқин вақт давомида Россияга ишга жалб қилингани ҳақида хабар берилганди.
