Аҳмад Фарғоний номидаги халқаро физика олимпиадасида 150 га яқин ўқувчи ўз билимини синовдан ўтказмоқда
Уларнинг билимини халқаро миқёсдаги тажрибали мутахассислардан иборат ҳакамлар ҳайъати баҳолаб боради.
Бир неча асрлар давомида аниқ ва табиий фанлар Ўзбекистон заминида кенг ривожланиб, Марказий Осиё ҳудуди дунё интеллектуал маркази бўлиб келган. Фарғонада Ўзбекистонда илк бор ўтказилаётган Аҳмад Фарғоний номидаги халқаро физика олимпиадаси бунга ёрқин мисол бўлади.
Фарғона вилояти ҳокимлиги матбуот хизмати хабарига кўра, олимпиадада Ўзбекистон, Россия, Тожикистон, Қозоғистон, Қирғизистон ва Ўмондан 140 нафарга яқин 9-11 синф ўқувчилари иштирок этади. Шунингдек, Туркия, Малайзия, Миср, Озарбайжон каби 12 та давлатнинг вакиллари олимпиадада онлайн шаклда қатнашиб, ўз билимини синовдан ўтказади.
Қайд этилишича, мактаб ўқувчилари ўртасида халқаро олимпиаданинг илк бор ташкил этилиши уларнинг физика фанига бўлган қизиқишини оширишга ва билимларини мустаҳкамлашга хизмат қилади.
Эслатиб ўтамиз, аввалроқ 8–13 ноябрь кунлари Фарғонада Ўзбекистонда илк бор Аҳмад ал-Фарғоний номидаги халқаро физика олимпиадаси бўлиб ўтиши ҳамда ҳамда Халқаро фан олимпиадалари ғолибларига 122,5 млн сўмдан пул мукофоти топширилгани ҳақида хабар берилганди.
