Сирдарёда бир нечта террорчи гуруҳ аъзолари ушланди
Улар Сурия Араб Республикаси ҳудудидаги террорчи ташкилотнинг аъзоларининг таъсирига тушгани маълум бўлган.
9 ноябрь куни ДХХ Сирдарё вилояти бўйича Бошқармаси ҳамда вилоят ИИБ билан ҳамкорликда тезкор тадбир ўтказилди.
Ховос туманида яшовчи Б.Т. ва унинг бир нечта ҳамфикрлари билан интернет орқали ёзишмалари ва ижтимоий тармоқлардаги ўзаро хабар алмашинув муносабатлари орасида экстремистик мазмундаги материаллар топилган.
Жумладан, “жиҳод”га чорловчи материалларни мунтазам равишда тарқатиб келган.
Бундан ташқари, гуруҳ етакчиси Б.Т.нинг келгусида Сурияга бориб, террорчи гуруҳлар таркибига қўшилишни режа қилганлиги тўғрисида аниқ маълумотлар олинди.
Террор гуруҳи аъзоларининг яшаш манзили тинтув қилинганда уларнинг уяли алоқа воситаларида қонунга ҳилоф бўлган маълумотлар топилган ва процессуал тартибда расмийлаштирилган. Мазкур далиллар асосида Б.Т.га Жиноят Кодексининг тегишли моддалари билан қўзғатилган жиноят иши доирасида қамоққа олиш чораси қўлланилди.
Ҳозирда Б.Т. ва унинг шериклари тергов-суриштирув тадбирлари давом эттирилмоқда.
Эслатиб ўтамиз, аввалроқ “Ҳизб-ут Таҳрир”нинг ўзбекистонлик етакчиси Қозоғистонда қўлга олингани ҳамда Жиззах вилоятида Ҳизб ут-Таҳрир ал-Исломи халқаро террорчилик гуруҳи вакиллари ушлангани ҳақида хабар берилганди. Шунингдек, Қашқадарёда хонадонида ҳужра ташкил этган она-бола аниқланганди.
Чўлпоной Аҳмедова
