Қашқадарёда хонадонида ҳужра ташкил этган она-бола аниқланди
“Виждон эркинлиги ва диний ташкилотлар тўғрисида»ги қонунининг янги таҳририга кўра, диний таълим муассасасидан ташқарида, шунингдек, хусусий тартибда диний таълим бериш ноқонуний фаолият сифатида белгиланган. Афсуски, сўнгги пайтларда ҳеч қандай рухсатномасиз диний таълим бериш ҳолатлари кўп учрамоқда.
Хусусан, Қашқадарё вилоятининг Китоб тумани ҳуқуқ-тартибот органлари томонидан олиб борилган тадбир давомида туманнинг “Денов” МФЙ ҳудудида яшовчи она-бола уйида “ҳужра” ташкил этгани фош этилди. Фуқаро Ф.К. ўз хонадонида Қарши шаҳрида истиқомат қилувчи 2 нафар вояга етмаган болалар ва унинг 2002 йилда туғилган қизи М.С. мактаб ёшида бўлган 11 нафар ўқувчи қизларга “ҳужра” шароитида диний таълим бериб келаётгани аниқланди.
Ўрганишлар давомида фуқаро Ф.К ва унинг қизи М.С. ҳеч қандай расмий диний маълумотга эга эмаслиги маълум бўлган.
Ҳозирда ушбу ҳолат юзасидан текширув ишлари олиб борилмоқда.
Эслатиб ўтамиз, аввалроқ Зангиотада ноқонуний ҳужра аниқлангани ҳамда Тошкент вилоятида 10 нафар жиҳодчи қўлга олингани ҳақида хабар берилганди.
Баҳринисо Мадумарова тайёрлади.
